استانادا ۇلى كومپوزيتور ۆولفگانگ امادەي موتسارتتىڭ 270 جىلدىعىنا ارنالعان «موتسارت» مۋزىكالىق-فيلوسوفيالىق قويىلىمى ساحنالاندى. اقتوبە وبلىسى مارتوك اۋىلىنداعى قامبار مەدەتوۆ اتىنداعى بالالار ونەر مەكتەبى جانىنداعى يۋنەسكو كلۋبىنىڭ «اكتەرلىك ونەر» سىنىبى ۇسىنعان تۋىندى كلاسسيكالىق مۋزىكا مەن ۇلتتىق مادەنيەتتى، تاريحي مۇرا مەن زاماناۋي تەاتر ونەرىن ءبىر ارناعا توعىستىردى.
قويىلىمنىڭ باستى ەرەكشەلىگى – كومپوزيتوردىڭ ءومىر جولىن بايانداۋمەن شەكتەلمەي، كورەرمەندى ادامگەرشىلىك قۇندىلىقتار تۋرالى ويلاندىرۋى. ساحنالىق كورىنىستەر ارقىلى وتباسى تاربيەسى، اتا-انا مەن بالا اراسىنداعى بايلانىس، ۇلكەنگە قۇرمەت، دوستىققا ادالدىق، مەيىرىمدىلىك پەن جاۋاپكەرشىلىك تاقىرىپتارى قوزعالادى.
اسىرەسە، بالا ۆولفگانگ پەن اكەسى لەوپولد موتسارتتىڭ قارىم-قاتىناسى ەرەكشە كورىنىس تاپقان. اكەسىنىڭ بالاسىنىڭ بويىنداعى قابىلەتتى ەرتە بايقاپ، ونىڭ ونەر-بىلىمگە ۇمتىلۋىنا جاعداي جاساۋى وتباسى قولداۋىنىڭ ماڭىزىن ايقىندايدى. ال موتسارتتىڭ شىعارماشىلىق جولىنداعى ادالدىعى مەن قيىن ساتتەردە وعان قولداۋ كورسەتكەن جانداردىڭ بەينەسى ىزگىلىك پەن جاناشىرلىقتىڭ ءمانىن اشادى.
سپەكتاكلدەگى ەستە قالارلىق كورىنىستەردىڭ ءبىرى – ساحناعا شىققان مىسىقپەن بايلانىستى ەپيزود. ونەر كورسەتىپ جاتقان بالا موتسارتتىڭ جانۋارعا دەگەن مەيىرىمىن تانىتۋى ارقىلى قويىلىم اۆتورلارى ءاربىر تىرشىلىك يەسىنە قامقورلىقپەن قاراۋ يدەياسىن جەتكىزەدى.
تۋىندىنىڭ تاعى ءبىر ەرەكشەلىگى – باتىس كلاسسيكالىق مۋزىكاسى مەن قازاقتىڭ ءداستۇرلى ونەرىن ساباقتاستىرۋى. موتسارت شىعارمالارىنىڭ اۋەنى دومبىرا ۇنىمەن ۇندەسىپ، كورەرمەنگە ەرەكشە مۋزىكالىق اسەر سىيلايدى. بۇل كوركەم شەشىم ۇلتتىق اسپاپتىڭ قادىرىن تانىتىپ قانا قويماي، الەمدىك جانە ۇلتتىق مادەنيەتتىڭ ءوزارا ۇيلەسىمىن كورسەتەدى.
سپەكتاكلدىڭ كورەرمەندەرى قاتارىندا قازاقستاننىڭ حالىق ءارتىسى الماحان نۇرپەيىسقىزى كەنجەبەكوۆا دا بولدى. ونەر يەسىنىڭ قويىلىمدى ارنايى كەلىپ تاماشالاۋى جاس ونەرپازدار ءۇشىن ەرەكشە قۇرمەت ءارى شىعارماشىلىق شابىت سىيلاعان ءسات بولدى.
قويىلىمنىڭ مازمۇنى مەملەكەت باسشىسى قاسىم-جومارت توقاەۆ كوتەرگەن «ادال ازامات» تۇجىرىمداماسىمەن دە ۇندەسەدى. ەڭبەكقورلىق، ادالدىق، وتباسىلىق تاربيە، دوستىق پەن ءوزارا كومەك سەكىلدى قۇندىلىقتار جاس كورەرمەنگە تەاتر تىلىمەن جەتكىزىلەدى.
سونىمەن قاتار، پرەمەرانىڭ 16 قاراشا – دۇنيەجۇزىلىك تولەرانتتىلىق كۇنىمەن تۇسپا-تۇس كەلۋى دە ەرەكشە مانگە يە. يۋنەسكو قۇندىلىقتارىمەن ساباقتاس قويىلىم ونەردىڭ ۇلت پەن تىلگە بولىنبەيتىن ورتاق ءتىل ەكەنىن، مادەنيەتتەر اراسىنداعى ديالوگ پەن ءوزارا تۇسىنىستىكتىڭ ماڭىزىن ايشىقتايدى.
ايتا كەتەيىك، «موتسارت» قويىلىمى بۇعان دەيىن حالىقارالىق «سالەم، استانا» بايقاۋىندا گران-پري يەلەنىپ، رەسپۋبليكالىق «ادال ازامات» بالالار مەن جاسوسپىرىمدەر تەاتر ونەرى فەستيۆالىندە ءبىرىنشى ورىن العان.
جاس ونەرپازداردىڭ ساحنالاۋىنداعى بۇل تۋىندى – الەمدىك كلاسسيكاعا تاعزىم ەتە وتىرىپ، ۇلتتىق ونەردى ۇلىقتايتىن، جاس ۇرپاقتىڭ بويىنا ىزگىلىك پەن رۋحاني قۇندىلىقتاردى سىڭىرۋگە باعىتتالعان شىعارماشىلىق جۇمىس.
