فوتو: جي
قازاقستاننىڭ پەتروپاۆل قالاسىندا Kyzylzhar Hub كولىك-لوگيستيكالىق كەشەنى سالىنادى، دەپ حابارلايدى "ادىرنا".
جوبا اياسىندا رەسەيدىڭ Ozon ماركەتپلەيسى مەن قىتايدىڭ Alibaba ونلاين ساۋدا الاڭىنداعى تاۋارلاردى ساقتاۋعا، وڭدەۋگە جانە تاراتۋعا ارنالعان ينفراقۇرىلىم قۇرۋ جوسپارلانىپ وتىر.
سولتۇستىك قازاقستان وبلىسى اكىمدىگىنىڭ مالىمەتىنشە، جوبا ەلەكتروندى ساۋدا نارىعىنا قىزمەت كورسەتەتىن زاماناۋي لوگيستيكالىق ينفراقۇرىلىم قالىپتاستىرۋدى كوزدەيدى.
جوبانىڭ ينۆەستيتسيالىق قۇنى 29 ميلليارد تەڭگەگە باعالانىپ وتىر. كەشەننىڭ تۇجىرىمداماسىن بىرىككەن اراب امىرلىكتەرىنەن كەلگەن Royal Investment International كومپانياسى ۇسىنعان. 18 قاراشادا وبلىس اكىمى عاۋەز نۇرمۇحامبەتوۆ كومپانيا قۇرىلتايشىسى مارات ساليحوۆپەن كەلىسسوز جۇرگىزگەن.
بولاشاق لوگيستيكالىق ورتالىقتىڭ جالپى اۋماعى 102 مىڭ شارشى مەتردى قۇرايدى. ونىڭ قۇرامىندا ازىق-تۇلىك پەن حالىق تۇتىناتىن تاۋارلارعا ارنالعان ارنايى قويمالار، جۇكتەردى قايتا تيەۋ الاڭدارى جانە كەڭسە بولمەلەرى بولادى.
جوبا ىسكە اسقان جاعدايدا پەتروپاۆل قالاسىنىڭ كولىك-لوگيستيكالىق الەۋەتىن ارتتىرىپ، ەلەكتروندى ساۋدا سالاسىنداعى تاۋار اينالىمىن دامىتۋعا مۇمكىندىك بەرەدى.
