الەۋمەتتانۋشى سەرىك بەيسەمباەۆ «سۇراۋى بار» Youtube ارناسىنا بەرگەن سۇحباتىندا الەۋمەتتىك زەرتتەۋ قورىتىندىسىمەن ءبولىستى.
– يمامداردىڭ Youtube-تاعى ۋاعىزدارىن تىڭداساڭىز، شوشيسىز ايتىپ جاتقان نارسەلەرىنەن. ول جەردە مەملەكەتتىڭ زايىرلىلىق ۇستانىمىنا قارسى نارسەلەر وتە كوپ. اشىق تۇردە مەملەكەتكە ەشكىم سىن ايتپايدى. بىراق زايىرلىلىقتىڭ ءبىر بەلگىسى – ادام قۇقىقتارى، ايەل ادامداردىڭ قۇقىقتارىنىڭ ساقتالۋى. ال بىزدە كوپ يمامداردى تىڭداساڭىز، «كوپ ايەل العان دۇرىس»، «قىز بالالارعا ءبىلىم الۋ كەرەك ەمەس»، «جالپى ءبىزدىڭ قوعامدى جاقسارتاتىن يسلام ءدىنى عانا» دەگەن سياقتى كەرتارتپا ويلار وتە كوپ، – دەيدى الەۋمەتتانۋشى.
– ولار ءوزىنىڭ جاماعاتىنا سايكەس ۋاعىز ايتادى. ەگەر ونىڭ جاماعاتى كونسەرۆاتيۆتى، پاتريارحالدى بولسا، سونىڭ ىعىنا جىعىلىپ، ولاردىڭ ەستىگىسى كەلەتىن ۋاعىزىن ايتاتىن بولادى. مەملەكەت قالاپ وتىرعان پروگرەسس، ءبىلىم الۋ دەگەن سياقتى دۇنيەلەردى ەمەس، كەرتارتپا ۇعىمداردىڭ تارالۋىنا ىقپال ەتىپ جاتىر، – دەيدى ساراپشى.
– دىن دەگەن ادامنىڭ ىشكى ەموتسياسى، جان دۇنيەسىمەن بايلانىستى. مەملەكەت وسىلاي شەكتەۋ قويعان كەزدە وعان قارسىلىق پايدا بولادى. مەملەكەتتىڭ قاي يمامنىڭ ۋاعىزىن تىڭداپ، كىمنىڭ ۋاعىزىن تىڭداۋعا بولمايتىنىن رەتتەپ تاستاۋى ادامداردىڭ نارازىلىعىن ءورشىتتى. سوسىن ءدىن ساياساتى ءدىننىڭ اتريبۋتتارىمەن كۇرەسكە اينالىپ كەتتى. ساقالى باردى، حيدجاپ كيگەندى سالافيتتەر دەدى، باسقا دەدى، – دەدى الەۋمەتتانۋشى.
“ادىرنا” ۇلتتىق پورتالى
