تالعار قالاسىنداعى №25 مەكتەپ قازاق-ورىس تىلدەرىندە ءبىلىم بەرەتىن بولدى. بۇل تۋرالى جۋرناليست قاراگوز ءسىمادىل جازدى، دەپ حابارلايدى «ادىرنا» ءتىلشىسى.
ايتۋىنشا، بۇعان دەيىن ءبىلىم باسقارماسى مەكەمە قازاق مەكتەبى بولادى دەپ ۋادە بەرگەن.
«ءسوز باسقا، ءىس باسقا بولىپ تۇر. بالا سانى جەتپەيدى دەگەن سىلتاۋ ايتىلدى. 889 قازاق وقۋشىنىڭ اتا-اناسىنىڭ ءوتىنىشى مەن دەرەگى جينالدى. ءماجىلىس دەپۋتاتتارى قازىبەك يسا، جاناربەك ءاشىمجان ءدال وسى مەكتەپكە قاتىستى ءمان-جايدان حاباردار.
ەندى مىنە، وقۋ جىلى باستالار شاقتا قازاق مەكتەبى ءبارىبىر ارالاس بولايىن دەپ تۇر.
تالعار اۋداندىق ءبىلىم ءبولىمى پاراقشاسىنا 25 مەكتەپكە ورىس تىلىندە ساباق بەرەتىن مۇعالىمدەرگە بوس ورىنعا حابارلاما بەرىپ، ونى ءوشىرىپ ۇلگەردى.
الماتى وبلىسى اكىمىنىڭ ءباسپاسوز حاتشىسى عالمۇرات جۇكەلگە ماسەلەنىڭ ءمان-جايىن بىلگىمىز كەلىپ حابارلاسىپ ەدىك، جينالىستا وتىر ەكەن. «قازىر ءبارىن انىقتاپ سىزگە حابارلاسامىن»، – دەگەن. ءسىرا، جينالىسى ءالى بىتپەگەن بولار، تەلەفونىن الماي تۇر. وسى مەكتەپتىڭ قازاق تىلىندە اشىلۋىنا قاتىستى ماسەلەنىڭ باسى-قاسىندا جۇرگەن تۇلعالارمەن كەڭ اڭگىمەلەسىپ، تولىق جاريالايمىن.
ال، سونىمەن جۇگىر، جينالىس جاسا، ءسوزىڭدى رەسمي نەگىزدە، ءبارىبىر، اۋداندىق اكىمدىك جانە مۇمكىن وبلىس اكىمىنىڭ ءوزى (ناقتى دەرەكتى كىمنەن انىقتارىمىزدى سۇرايتىن ادام تەلەفونىن الماعاندىقتان، وسىلاي بولجامداۋعا ءماجبۇرمىز) قازاق مەكتەبى بولايىن دەپ تۇرعان مەكەمەنى ارالاس قىلىپ تىنباقشى»،– دەدى ول.
