اقمولا وبلىسىنداعى ستەپنوگورسك قالاسىندا ەر ادام 87 جاستاعى زەينەتكەردى توناپ كەتتى، دەپ حابارلايدى «ادىرنا» ءتىلشىسى.
پوليتسيا باسقارماسىنا 1956 جىلى تۋعان جەرگىلىكتى تۇرعىن وتىنىشپەن جۇگىندى. ول اعىمداعى جىلدىڭ 21 تامىزىندا كەشكى ساعات 18.00-دە جەكە تۇراتىن 87 جاستاعى اناسىنىڭ ۇيىنە بەلگىسىز ەر ادام الداۋ جولىمەن كىرىپ، 500 مىڭ تەڭگە سوماسىندا اقشا قاراجاتىن اشىق تۇردە ۇرلاپ كەتكەنىن ايتتى.
قاريانىڭ ايعاقتارى بويىنشا قاسكۇنەم ءوزىن قىزمەت كورسەتەتىن كومپانيانىڭ قىزمەتكەرى رەتىندە تانىستىرعان.
«ەر ادامعا سەنگەن زەينەتكەر كۇدىكتىنىڭ كوز الدىندا بارلىق جيناعىن الىپ شىققان، ناتيجەسىندە قىلمىسكەر قاريانىڭ اقشاسىن جۇلىپ الىپ، قاشىپ كەتكەن. جەدەل-ىزدەستىرۋ شارالارى بارىسىندا ستەپنوگورسك پوليتسەيلەرى كۇدىكتىنىڭ تۇلعاسىن انىقتادى. ول بۇرىن ۇرلىق ءۇشىن قىلمىستىق جاۋاپكەرشىلىككە تارتىلعان، جاقىن ماڭداعى اۋىلدىڭ 35 جاستاعى تۇرعىنى بولىپ شىقتى»،– دەپ ءتۇسىندىردى پوليتسيا دەپارتامەنتى.
اتالعان فاكتى بويىنشا پوليتسيا باسقارماسى قر قك 191-بابىنىڭ 1-بولىگى "توناۋ" بويىنشا سوتقا دەيىنگى تەرگەۋدى باستادى.
