«AMANAT» پارتياسىنىڭ ورتالىق اپپاراتىندا «TALQYLAU» ديالوگ الاڭىنىڭ كەزەكتى وتىرىسى ءوتتى، دەپ جازادى "ادىرنا" ۇلتتىق پورتالى.
ساراپتامالىق تالقىلاۋ تاقىرىبى: «جولداۋ 2022: ساياسي رەفورمالاردىڭ جالعاسى».
«AMANAT» پارتياسىنىڭ اتقارۋشى حاتشىسى اسحات ورالوۆ ءبىر رەتتىك پرەزيدەنتتىك مەرزىم تۋرالى باستاما سۋپەرپرەزيدەنتتىك مودەلدەن تۇپكىلىكتى كەتۋ بويىنشا بۇعان دەيىنگى قادامداردىڭ قيسىندى جالعاسى ەكەنىن اتاپ ءوتتى.
«پرەزيدەنتتىك وكىلەتتىكتىڭ مەرزىمىن 7 جىلدا ءبىر كادەنتسياعا دەيىن قىسقارتۋ ادىلەتتى قازاقستاننىڭ ساياسي كەپىلى بولادى. وسىناۋ باتىل دا بىرەگەي قادام ەلىمىزدىڭ الداعى ۋاقىتتاعى ساياسي باعىتىنا قاتىستى سۇراقتاردىڭ جاۋابىن تابۋعا مۇمكىندىك بەرەدى. كونستيتۋتسياعا ءتيىستى وزگەرىستەردى كەيىنگە قالدىرماي، وسى جىلدىڭ وزىندە-اق ەنگىزۋ قاجەت دەپ سانايمىن»، – دەدى اسحات ورالوۆ.
ماجىلىستەگى «AMANAT» پارتياسىنىڭ دەپۋتاتى ەرلان سايروۆ قوعامنىڭ جولداۋدى بەلسەندى تالقىلاۋى ۇلتتىق تۇتاستىقتىڭ نىعايۋىنا ىقپال ەتەدى دەپ سانايدى.
«بۇرىنعى جۇيەنى جويۋ ءۇشىن پرەزيدەنتتىكتى ءبىر مەرزىمگە شەكتەۋ قاجەت. بۇگىنگى ساياسي رەفورمالاردىڭ نەگىزگى ءمانى – وسى. جەتى جىلدىق مەرزىمگە كەلەتىن بولساق، بۇل ويعا العان مىندەتتەردى ىسكە اسىرۋ ءۇشىن جەتكىلىكتى كەزەڭ. سونىمەن قاتار، بيلىكتىڭ مونوپوليالانۋىنا جول بەرمەيدى. بارلىق سالانىڭ دامۋىندا تۇراقتىلىق پايدا بولادى»، – دەپ اتاپ ءوتتى ەرلان سايروۆ.
ءوز كەزەگىندە، قوعام قايراتكەرى عالىم بايتوق پرەزيدەنت كەزەكتەن تىس سايلاۋ جاريالاۋ ارقىلى باتىل قادام جاساپ وتىرعانىن اتاپ ءوتتى.
«جەتى جىل – قالىپتى جۇمىس مەرزىمى. ەگەر قازىرگى پرەزيدەنت وسى جىلى بىردەن جەتى جىلدىق مەرزىمگە بەت الاتىن بولسا، وندا ونىڭ وكىلەتتىگى قايتكەن كۇننىڭ وزىندە 2029 جىلى اياقتالادى. ياعني، قازىرگى نورماعا سايكەس 2024 جىلى سايلاۋعا تۇسسە دە سولاي بولار ەدى. ياعني، ونىڭ وكىلەتتىك مەرزىمى ءىس جۇزىندە ءبىر جىلعا دا ۇزارمايدى. سونىمەن قاتار، پرەزيدەنتتەردىڭ وكىلەتتىك مەرزىمى 10 جىلدان 7 جىلعا دەيىن قىسقارادى»، – دەدى ول.
«پرەزيدەنتتىڭ ورنىقتى ءادىل مەملەكەت قۇرۋ جونىندەگى ناقتى ساياسي ماقساتى بار. بۇل ماقسات رەفورمالاردى، سونىڭ ىشىندە تانىمالدىلىعى جوق رەفورمالاردى قاجەت ەتەدى. ونى ىسكە اسىرۋ ءۇشىن ماندات پەن ۋاقىت قاجەت. 7 جىلدىق مەرزىم – بەلگىلەنگەن رەفورمالاردى جۇزەگە اسىرۋ ءۇشىن جەتكىلىكتى مەرزىم دەپ ەسەپتەيمىن»، – دەپ اتاپ ءوتتى ساياساتتانۋشى ءارى قوعام قايراتكەرى دانات جۇمين.
«TALQYLAU» وتىرىسىندا ماجىلىستەگى «AMANAT» فراكتسياسىنىڭ مۇشەسى ەكاتەرينا سمىشلياەۆا جولداۋداعى ەلدىڭ ەكونوميكالىق دامۋىنا قاتىستى اسپەكتىلەرگە نازار اۋداردى.
«كەز كەلگەن وزگەرىستىڭ نەگىزى – مىقتى ەكونوميكا. جولداۋدا اۋقىمدى الەۋمەتتىك-ەكونوميكالىق بلوك ۇسىنىلدى. بۇل – رەفورمالاردىڭ جاڭا تولقىنى ەمەس، بۇعان دەيىن بەلگىلەنگەن باعىتتىڭ قيسىندى جالعاسى. مەملەكەتتىڭ ەكونوميكاداعى ءرولىن ازايتۋ، ونى مونوپولياسىزداندىرۋ، رەسۋرستاردى ءادىل ءبولۋ قادامدارى الداعى ۋاقىتتا ەلەۋلى ەكونوميكالىق ىلگەرىلەۋلەر تۋرالى ايتۋعا مۇمكىندىك بەرەدى. ءادىل قوعامنىڭ ىرگەسى قالانادى»، – دەپ اتاپ ءوتتى دەپۋتات.
ءوز كەزەگىندە، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى، پروفەسسور مارات ءباشىموۆ سوت-قۇقىق سالاسىن رەفورمالاۋعا قاتىستى ءوز ويىن ءبىلدىردى.
«سۋديا تەك سوت تورەلىگىمەن اينالىسۋى كەرەك. ول كادر ماسەلەسىنە ارالاسپاۋى ءتيىس. ارالاساتىن بولسا، سىبايلاس جەمقورلىق تاۋەكەلدەرى پايدا بولادى. پرەزيدەنت رەۆوليۋتسيالىق شەشىم ۇسىندى. ەندى جوعارى سوت كەڭەسى ىرىكتەۋمەن، وقىتۋمەن، اتتەستاتتاۋمەن جانە تاعى باسقامەن اينالىسادى. ال سۋديالار ءوز جۇمىسىن ىستەيدى. تيىسىنشە، ولار اتقاراتىن جۇمىستىڭ تيىمدىلىگى ارتادى»، – دەدى ول.
«قازاقستاننىڭ ازاماتتىق اليانسىنىڭ» پرەزيدەنتى بانۋ نۇرعازيەۆانىڭ پىكىرىنشە، وسى كۇنگى وزەكتى ماسەلەنىڭ ءبىرى – مەملەكەتتىك باسقارۋ جۇيەسىن قايتا جۇكتەۋ.
«ءبىز تەك ءتۇسىندىرىپ قانا قويماي، باستامالاردى جۇزەگە اسىرۋعا جانە قوعامدىق مونيتورينگ ۇدەرىستەرىنە ءوزىمىز دە ارالاسىپ، قوعامدى دا جۇمىلدىرۋىمىز كەرەك. جاپ-جاقسى رەفورمانى قولعا الۋعا بولادى. بىراق ونى جۇزەگە اسىرۋ بارىسى ەرەكشە نازار اۋدارۋدى قاجەت ەتەدى»، – دەدى بانۋ نۇرعازيەۆا.
«TALQYLAU» الاڭنىڭ مودەراتورى «AMANAT» پارتياسى ساياسي كەڭەسىنىڭ مۇشەسى، تانىمال تەلەجۇرگىزۋشى ماقسات تولىقباي بولدى.
ەسكە سالا كەتەيىك، «TALQYLAU» ديالوگ الاڭىن قۇرۋ باستاماسى «AMANAT» پارتياسىنىڭ 1 ناۋرىزدا وتكەن كەزەكتەن تىس سەزىندە پارتيالىق ترانسفورماتسيا باعدارلاماسى تارماقتارىنىڭ ءبىرى رەتىندە كوتەرىلگەن بولاتىن. الاڭدا ساراپشىلار، دەپۋتاتتار، مەملەكەتتىك ورگاندار مەن ۇەۇ وكىلدەرى ازاماتتاردى تولعاندىراتىن وزەكتى ماسەلەلەردى شەشۋ جونىدە ۇسىنىستار ازىرلەۋ ءۇشىن تۇراقتى تۇردە كەزدەسىپ وتىرادى.
"ادىرنا" ۇلتتىق پورتالى
