مەملەكەت باسشىسى قاسىم-جومارت توقاەۆ بۇۇ باس اسسامبلەياسى 77-سەسسياسىنىڭ جالپى دەباتىندا سويلەگەن سوزىندە يادرولىق قارۋدان ازات الەم قۇرۋ جايىندا ءسوز قوزعادى، دەپ حابارلايدى “ادىرنا” ۇلتتىق پورتالى.
ول ەلىمىزدىڭ يادرولىق قارۋ سىناقتارىنان كوپ زارداپ شەككەنىن ايتا كەلە، يادرولىق دەرجاۆالار اراسىنداعى تەكەتىرەستىڭ كۇشەيۋ قاۋپىن جاقسى تۇسىنەتىنىن العا تارتتى.
«وسىعان وراي يادرولىق قارۋسىزدانۋ قازاقستاننىڭ سىرتقى ساياساتىنىڭ ماڭىزدى قىرىنا اينالدى. ءبىز يادرولىق قارۋدان ازات الەم قۇرۋ جولىنداعى كۇرەسىمىزدى جالعاستىرا بەرەمىز. بۇل سالاداعى كەيبىر جەتىستىكتەرگە قاراماستان، وكىنىشكە قاراي، جالپى احۋال جاقسى ەمەس. يادرولىق دەرجاۆالار اراسىندا كۇشەيىپ كەلە جاتقان باسەكە مەن تەكەتىرەس ءبىزدى الاڭداتادى. سونداي-اق ءبىز يادرولىق قارۋدى تاراتپاۋ تۋرالى شارتتىڭ جالپى كونفەرەنتسياسى اياسىندا ىلگەرىلەۋ جوق ەكەنىنە الاڭدايمىز. الدىمىزدا قارۋسىزدانۋ جانە يادرولىق قارۋدى تاراتپاۋ سالاسىنداعى جاڭا مەحانيزمدەردى ازىرلەۋ جونىندە اسا كۇردەلى مىندەت تۇر»، - دەدى مەملەكەت باسشىسى.
سونداي-اق، قاسىم-جومارت توقاەۆ COVID-19 پاندەمياسى بيولوگيالىق قاۋىپ-قاتەرلەردى باسقارۋعا جانە ازايتۋعا باعىتتالعان شۇعىل شارالار قابىلداۋ قاجەت ەكەنىن ايقىنداپ بەرگەنىن اتاپ ءوتتى.
«حالىقارالىق ىنتىماقتاستىق ءۇشىن ارنايى ينستيتۋت نەمەسە ورگان قۇرۋعا ەشقانداي شارا قابىلداماي، 50 جىلدان بەرى بيولوگيالىق قارۋ تۋرالى كونۆەنتسيانىڭ ەرەجەلەرىن ءالى دە ۇستانۋىمىز ءبىزدى الاڭداتۋى كەرەك. وسىعان وراي بۇعان دەيىن ۇسىنعان بيولوگيالىق قاۋىپسىزدىك جونىندە حالىقارالىق اگەنتتىك قۇرۋ تۋرالى باستامامدى قايتا ەسكە سالعىم كەلەدى»، - دەدى پرەزيدەنت.
”ادىرنا” ۇلتتىق پورتالى
