بۇل تۋرالى ورال قالالىق ءماسليحاتىنىڭ كەزەكتى 19-شى سەسسياسىندا دەپۋتاتتار ءبىراۋىزدان شەشىم قابىلدادى.
سەسسيانىڭ كۇن تارتىبىندە ورال قالاسىندا «باتىس قازاقستان وبلىسى الەۋمەتتىك-ەكونوميكالىق دامىتۋدىڭ 2022-2025 جىلدارعا ارنالعان كەشەندى جوسپارىن» ىسكە اسىرۋ، ورال قالاسى بويىنشا كوممۋنالدىق قالدىقتاردىڭ ءتۇزىلۋ جانە جيناقتالۋ نورمالارىن بەكىتۋ، قاتتى تۇرمىستىق قالدىقتاردى جيناۋ، تاسىمالداۋ، سۇرىپتاۋ جانە كومۋگە ارنالعان تاريفتەردى بەكىتۋ، كوندومينيۋم وبەكتىسىن باسقارۋعا جانە كوندومينيۋم وبەكتىسىنىڭ ورتاق مۇلكىن كۇتىپ-ۇستاۋعا ارنالعان شىعىستاردىڭ ەڭ از مولشەرى بەكىتۋ ماسەلەلەرى قارالدى.
– سەسسيادا كوتەرىلگەن وزەكتى ماسەلە بۇل قاتتى تۇرمىس قالدىقتارىن جيناۋعا، وڭدەۋگە قاتىستى ءتاريفتىڭ كوتەرىلۋى تۋرالى بولدى. قالا تازالىعى بۇل بىرىنشىدەن ۇيدەن شىققان قوقىستاردىڭ ۋاقىتىلى جينالىپ، قالا سىرتىنا شىعارىلىپ، جويىلۋىنان باستالادى. سوندىقتان بۇل جەردە جۇمىس كۇشىنىڭ، تەحنيكانىڭ ماڭىزى زور. ءتاريفتى كوتەرۋ ارقىلى جۇمىسشىلاردىڭ جالاقىسى كوتەرىلەتىنىن، تەحنيكانىڭ جاڭاراتىنىن الدىڭعى سەسسيالاردىڭ وتىرىسىندا ايتقان بولاتىنبىز. ەندى بۇگىنگى سەسسيانىڭ شەشىمى بويىنشا قاتتى تۇرمىستىق قالدىقتاردى جيناۋ، تاسىمالداۋ، وڭدەۋگە الىناتىن تاريف كوپقاباتتى ۇيلەردىڭ تۇرعىندارى ءۇشىن 1 ادامعا 442,92 تەڭگەنى، جەكە ۇيلەرگە 1 ادامعا 451,64 تەڭگەنى، ال بىرلىك كولەم ءۇشىن جىلدىق تاريف 2092,55 تەڭگەنى قۇرايتىن بولدى، – دەيدى قالالىق ءماسليحات دەپۋتاتى نۇرگۇل اشىقوۆا.
ال قالالىق ءماسليحات دەپۋتاتى كەنەسارى نۇرشا كوپبالالى وتباسىلارعا، مۇمكىندىگى شەكتەۋلى جاندارعا تاريف باعامىن جەڭىلدەتۋدى سۇرادى جانە ءوتىنىش قاناعاتتاندىرىلدى.
سونداي-اق جيىندا ورال قالاسى بويىنشا شەتەلدىكتەر ءۇشىن 2022 جىلعا ارنالعان تۋريستىك جارنا مولشەرلەمەلەرىن بەكىتۋ، ورال قالالىق ءماسليحاتىنىڭ قالالىق اۋماقتىق جانە ۋچاسكەلىك سايلاۋ كوميسسيالارىنىڭ قۇرامىن سايلاۋ تۋرالى شەشىمىنە وزگەرىستەر ەنگىزۋ ماسەلەلەرى تالقىلاندى.
جوعارىدا قارالعان ماسەلەلەر بويىنشا قالا دەپۋتاتتارى ءتيىستى شەشىمدەردى قابىلدادى.
