باتىس قازاقستان وبلىسىندا «ادال ۇرپاق – ورتاق مىندەت» اتتى اتا-انالار كوميتەتىنىڭ وبلىستىق فورۋمى ۇيىمداستىرىلدى. اۋقىمدى شاراعا اتا-انالار، ءبىلىم بەرۋ ۇيىمدارىنىڭ وكىلدەرى، مەملەكەتتىك قىزمەتكەرلەر مەن بالا قاۋىپسىزدىگىنە جاۋاپتى ماماندار قاتىستى.
فورۋم اياسىندا قاتىسۋشىلار بالا تاربيەسىندەگى وزەكتى ماسەلەلەردى تالقىلاپ، وتباسىلىق قۇندىلىقتاردى دارىپتەۋ مەن اتا-انالاردىڭ تاربيە ۇردىسىندەگى ءرولىن ارتتىرۋ جايىندا پىكىر الماستى. سونداي-اق، وسكەلەڭ ۇرپاقتىڭ تاربيەسىنە بەلسەندى ارالاسىپ جۇرگەن اتا-انالار ماراپاتتالدى.
جيىندا ءسوز العان ماماندار بالا تاربيەسى – مەملەكەتتىك ماڭىزى بار ماسەلە ەكەنىنە ەرەكشە توقتالدى. سەبەبى بۇگىنگى جاس – ەرتەڭگى ەلدىڭ تىرەگى. وسىعان بايلانىستى ءبىلىم بەرۋ وشاقتارىندا تاربيە جۇمىستارىنا ەرەكشە كوڭىل بولىنۋدە. الايدا، مامانداردىڭ ايتۋىنشا، بۇل رەتتە بارلىق جۇكتەمەنى مۇعالىمگە ارتىپ قويۋ جەتكىلىكسىز.– بالانىڭ قالىپتاسۋىنا تەك مەكتەپ قانا ەمەس، وتباسىنداعى احۋال دا تىكەلەي اسەر ەتەدى. سول سەبەپتى اتا-انالاردىڭ بەلسەندىلىگى مەن جاۋاپكەرشىلىگى اسا ماڭىزدى. فورۋمنىڭ نەگىزگى ماقساتى – مەكتەپ، وتباسى جانە قوعام اراسىنداعى ءوزارا بايلانىستى نىعايتۋ، – دەيدى ۇيىمداستىرۋشىلار.
بۇگىندە وبلىس مەكتەپتەرىندە وقۋشىلاردىڭ ءوزىن-ءوزى باسقارۋ جۇيەسى، پاترۋلدىك باعدارلاما سىندى ءتۇرلى جوبالار ءساتتى جۇزەگە اسىرىلۋدا. سونىمەن قاتار، سەنىم تەلەفوندارى ارقىلى بالالارعا قۇقىقتىق، پسيحولوگيالىق قولداۋ كورسەتۋ شارالارى دا قولعا الىنعان.بقو بالا قۇقىعى جونىندەگى وڭىرلىك ۋاكىلى شاتتىق وتەباليەۆانىڭ ايتۋىنشا، بالانىڭ تۇلعا رەتىندە قالىپتاسۋىندا ۇيدەگى جايلى ورتانىڭ ماڭىزى زور. – ءاربىر اتا-انا ءوز بالاسىنىڭ جان دۇنيەسىن ءتۇسىنىپ، مىنەز-قۇلقىنداعى ەرەكشەلىكتەردى جەتە بىلگەنى ءجون. تەك مەكتەپكە سەنىپ وتىرۋ ازدىق ەتەدى. ءۇي مەن مەكتەپ اراسىنداعى بايلانىستىڭ ناتيجەلى بولۋى – ورتاق مۇددە، – دەدى وڭىرلىك ۋاكىل.
فورۋم بارىسىندا مەكتەپ پەن اتا-انالار اراسىنداعى ارىپتەستىك ماسەلەلەرى كەڭىنەن ءسوز بولدى. تىڭ تاجىريبەلەر تالدانىپ، اتا-انالار كوميتەتىنىڭ جۇمىسىنان ۇلگىلى مىسالدار كەلتىرىلدى. سونىمەن قاتار، «ادال ازامات» اتتى تاربيە تۇجىرىمداماسىنىڭ مازمۇنى تالقىلانىپ، ناقتى ءىس-شارالار جوسپارى ۇسىنىلدى.
ءىس-شارا سوڭىندا مەكتەپپەن تىعىز بايلانىستا جۇمىس ىستەپ جۇرگەن بەلسەندى اتا-انالار ماراپاتتالدى.
