باتىس قازاقستان وبلىسىندا سوت اسكەري قىزمەتتەن قاشۋ ءۇشىن قازاقستاننىڭ مەملەكەتتىك شەكاراسىن زاڭسىز كەسىپ ءوتىپ، ءۇشىنشى ەلگە جەتۋگە ارەكەتتەنگەن رەسەي ازاماتىنا قاتىستى ءىستى قارادى. بۇل تۋرالى بقو سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
سوت مالىمەتىنشە، ەر ادام 2025 جىلدىڭ شىلدە ايىندا رەسەي ارمياسىنداعى قىزمەت ورنىن ءوز ەركىمەن تاستاپ، قۇقىق قورعاۋ ورگاندارىنان جاسىرىنعان. 2026 جىلدىڭ مامىرىندا ول قازاقستانعا ءوتۋدى ۇيعارعان. ەر ادام سمارتفونداعى ەلەكتروندى كارتالاردىڭ كومەگىمەن باعىتىن الدىن الا جوسپارلاپ، رەسمي وتكىزۋ بەكەتىن اينالىپ ءوتىپ، مەملەكەتتىك شەكارانى بەلگىلەنبەگەن جەردەن كەسىپ وتكەن.
كەيىن جاقىن ماڭداعى تاسجولعا جەتىپ، ورال قالاسىنا بارعان. ودان سوڭ جامبىل وبلىسىنداعى تاراز قالاسىنا جەتىپ، سول جەردەن باسقا مەملەكەتكە كەتۋدى كوزدەگەن. الايدا جوسپارىن تولىق جۇزەگە اسىرا الماعان. تارازدا ونى ۇلتتىق قاۋىپسىزدىك كوميتەتىنىڭ قىزمەتكەرلەرى ۇستاعان.
ءىستى بوكەيوردا اۋداندىق سوتى قارادى. سوت وتىرىسىندا ايىپتالۋشى ءوز كىناسىن تولىق مويىندادى. ول شەكارانى زاڭسىز كەسىپ وتۋگە ءماجبۇر بولعانىن ايتىپ، وزىنە باس بوستاندىعىنان ايىرۋ جازاسىن قولدانباۋدى، قازاقستاننان شىعارماۋدى جانە راقىمشىلىق جاساۋدى سۇرادى.
سوت ونى مەملەكەتتىك شەكارانى زاڭسىز كەسىپ وتكەنى ءۇشىن كىنالى دەپ تانىپ، 865 مىڭ تەڭگە كولەمىندە ايىپپۇل سالدى. سونداي-اق قازاقستان اۋماعىنان شىعارۋ جانە ەلگە بەس جىل مەرزىمگە كىرۋگە تىيىم سالۋ تۋرالى شەشىم شىعاردى.
سونىمەن قاتار سوت 2026 جىلعى 1 شىلدەدە جاڭا كونستيتۋتسيانىڭ قابىلدانۋىنا بايلانىستى قابىلدانعان راقىمشىلىق تۋرالى زاڭدى قولدانىپ، ەر ادامدى ايىپپۇل تولەۋدەن تولىق بوساتتى. الايدا ەلدەن شىعارۋ جانە بەس جىلعا كىرۋگە تىيىم سالۋ شارالارى كۇشىندە قالدى. سوت شەشىمى زاڭدى كۇشىنە ەندى.
ايتا كەتەيىك، ۋكرايناداعى سوعىس باستالعاننان كەيىن قازاقستان اسكەري قىزمەت اتقارعىسى كەلمەگەن رەسەيلىكتەر قونىس اۋدارعان نەگىزگى باعىتتاردىڭ بىرىنە اينالدى. ولاردىڭ اراسىندا اسكەري بولىمدەرىن تاستاپ كەتكەن اسكەري قىزمەتكەرلەر دە بولدى. الايدا قۇقىق قورعاۋشىلار رەسەيدەن قاشقان دەزەرتيرلەردىڭ قازاقستانداعى قۇقىقتىق جاعدايى ءالسىز ەكەنىن ايتادى. ولار بوسقىن مارتەبەسىن الا المايدى، ال كەيبىرى شەكارانى زاڭسىز كەسىپ ءوتۋ فاكتىلەرى بويىنشا قىلمىستىق ىستەردىڭ فيگۋرانتىنا اينالادى.
سونداي-اق قاشقىنداردى ۇستاپ، رەسەي تاراپىنا بەرۋ جاعدايلارى دا تىركەلگەن. 2022 جىلدىڭ سوڭىندا قازاقستان بۇرىنعى فكق وفيتسەرى ميحايل ءجيليندى دەپورتاتسيالاعان. كەيىن ول رەسەيدە باس بوستاندىعىنان ايىرۋ جازاسىنا كەسىلدى. ال 2024 جىلدىڭ ساۋىرىندە استانادا بۇرىنعى اسكەري قىزمەتكەر كاميل كاسيموۆ ۇستالدى. قۇقىق قورعاۋشىلاردىڭ مالىمەتىنشە، ول الدىمەن قاراعاندى وبلىسىنداعى پريوزەرسك قالاسىنداعى اسكەري بولىمگە جەتكىزىلىپ، كەيىن ومبىعا جونەلتىلگەن. وندا اسكەري كەزەڭدەگى دەزەرتيرلىك ءىسى بويىنشا التى جىلعا قاتاڭ رەجيمدەگى كولونياعا سوتتالعان.
