بقو كازتالوۆ اۋدانىنىڭ جالپاقتال اۋىلىندا ۇلىستىڭ ۇلى كۇنى قارساڭىندا جاس ۇستاز باسپانالى بولدى.
— بۇگىندە ەلىمىز مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن جاڭارۋ جولىنا نىق قادام باسىپ كەلەدى. ۇلتتىق قۇندىلىقتاردى ۇلىقتاي وتىرىپ، وڭىرلەردى دامىتۋ، اۋىلدىڭ الەۋەتىن ارتتىرۋ – مەملەكەتتىك ساياساتتىڭ باسىم باعىتتارىنىڭ ءبىرى. وسى رەتتە اۋدانىمىزدا جۇزەگە اسىرىلىپ جاتقان «قالادان-اۋىلعا» وڭىرلىك باعدارلاماسىنىڭ ماڭىزى ەرەكشە. باعدارلاما اياسىندا اۋدانىمىزدىڭ 16 ەلدى مەكەنىنە 47 وتباسى قونىس اۋدارىپ، جاڭا ومىرگە قادام باستى. قونىس اۋدارعان ازاماتتاردىڭ قاتارىندا 91 ەرەسەك ادام مەن 155 بالا بار. اسىرەسە، جالپاقتال اۋىلىنا 4 دارىگەر وتباسىنىڭ كەلۋى حالىقتىڭ دەنساۋلىعىن جاقسارتۋعا باعىتتالعان ناقتى قادام، اۋىلدىق جەرلەردەگى الەۋمەتتىك ينفراقۇرىلىمنىڭ نىعايىپ كەلە جاتقانىنىڭ ايقىن دالەلى، — دەگەن اۋدان اكىمى اسلانبەك سارقۇلوۆ ءوڭىر باسشىسى ناريمان تورەعاليۇلىنىڭ باستاماسىمەن جۇزەگە اسىپ جاتقان «قالادان-اۋىلعا» جوباسى اياسىندا، ورال قالاسىنان قونىس اۋدارعان، ع.مولداشەۆ اتىنداعى جوببم-ءنىڭ ينفورماتيكا ءپانى مۇعالىمى اسىلجان باقىتجانعا جاڭا تۇرعىن ءۇيدىڭ كىلتىن سالتاناتتى تۇردە تابىستادى.
اسىلجان باقىتجان دا مەرەكە قارساڭىندا قۋانىشىنىڭ ەسەلەنگەنىنە ريزا ەكەندىگىن ءبىلدىردى.
— وسىنداي قۋانىشتى ساتتە باسپانالى بولىپ وتىرعانىما ەرەكشە ريزامىن. بۇل – ءبىزدىڭ وتباسىمىز ءۇشىن ۇلكەن قولداۋ، ءارى جاڭا ءومىردىڭ باستاۋى. مەملەكەت باسشىسى قاسىم-جومارت كەمەلۇلى توقاەۆقا، ءوڭىر باسشىسى ناريمان تورەعاليۇلىنا، سونداي-اق اۋدان باسشىلىعىنا حالىقتىڭ ءال-اۋقاتىن ارتتىرۋ، جاس مامانداردى قولداۋ باعىتىندا جاساپ جاتقان جۇيەلى جۇمىستارى ءۇشىن شىنايى العىسىمدى بىلدىرەمىن. اۋىلعا كەلىپ، ەڭبەك ەتۋگە بارلىق جاعداي جاسالىپ وتىر. ءبىز دە ءوز كەزەگىمىزدە ەل سەنىمىن اقتاپ، ءبىلىم سالاسىندا ايانباي قىزمەت ەتىپ، وسكەلەڭ ۇرپاق تاربيەسىنە ۇلەس قوسۋعا بار كۇش-جىگەرىمىزدى سالامىز، — دەدى اسىلجان باقىتجان.
