Batys Qazaqstan oblysynda sot äskeri qyzmetten qaşu üşın Qazaqstannyŋ memlekettık şekarasyn zaŋsyz kesıp ötıp, üşınşı elge jetuge ärekettengen Resei azamatyna qatysty ıstı qarady. Būl turaly BQO sotynyŋ baspasöz qyzmetı aitty, dep habarlaidy «Adyrna» tılşısı.
Sot mälımetınşe, er adam 2025 jyldyŋ şılde aiynda Resei armiiasyndaǧy qyzmet ornyn öz erkımen tastap, qūqyq qorǧau organdarynan jasyrynǧan. 2026 jyldyŋ mamyrynda ol Qazaqstanǧa ötudı ūiǧarǧan. Er adam smartfondaǧy elektrondy kartalardyŋ kömegımen baǧytyn aldyn ala josparlap, resmi ötkızu beketın ainalyp ötıp, memlekettık şekarany belgılenbegen jerden kesıp ötken.
Keiın jaqyn maŋdaǧy tasjolǧa jetıp, Oral qalasyna barǧan. Odan soŋ Jambyl oblysyndaǧy Taraz qalasyna jetıp, sol jerden basqa memleketke ketudı közdegen. Alaida josparyn tolyq jüzege asyra almaǧan. Tarazda ony Ūlttyq qauıpsızdık komitetınıŋ qyzmetkerlerı ūstaǧan.
Istı Bökeiorda audandyq soty qarady. Sot otyrysynda aiyptaluşy öz kınäsın tolyq moiyndady. Ol şekarany zaŋsyz kesıp ötuge mäjbür bolǧanyn aityp, özıne bas bostandyǧynan aiyru jazasyn qoldanbaudy, Qazaqstannan şyǧarmaudy jäne raqymşylyq jasaudy sūrady.
Sot ony memlekettık şekarany zaŋsyz kesıp ötkenı üşın kınälı dep tanyp, 865 myŋ teŋge kölemınde aiyppūl saldy. Sondai-aq Qazaqstan aumaǧynan şyǧaru jäne elge bes jyl merzımge kıruge tyiym salu turaly şeşım şyǧardy.
Sonymen qatar sot 2026 jylǧy 1 şıldede jaŋa Konstitusiianyŋ qabyldanuyna bailanysty qabyldanǧan raqymşylyq turaly zaŋdy qoldanyp, er adamdy aiyppūl töleuden tolyq bosatty. Alaida elden şyǧaru jäne bes jylǧa kıruge tyiym salu şaralary küşınde qaldy. Sot şeşımı zaŋdy küşıne endı.
Aita keteiık, Ukrainadaǧy soǧys bastalǧannan keiın Qazaqstan äskeri qyzmet atqarǧysy kelmegen reseilıkter qonys audarǧan negızgı baǧyttardyŋ bırıne ainaldy. Olardyŋ arasynda äskeri bölımderın tastap ketken äskeri qyzmetkerler de boldy. Alaida qūqyq qorǧauşylar Reseiden qaşqan dezertirlerdıŋ Qazaqstandaǧy qūqyqtyq jaǧdaiy älsız ekenın aitady. Olar bosqyn märtebesın ala almaidy, al keibırı şekarany zaŋsyz kesıp ötu faktılerı boiynşa qylmystyq ısterdıŋ figurantyna ainalady.
Sondai-aq qaşqyndardy ūstap, Resei tarapyna beru jaǧdailary da tırkelgen. 2022 jyldyŋ soŋynda Qazaqstan būrynǧy FKQ ofiserı Mihail Jilindı deportasiialaǧan. Keiın ol Reseide bas bostandyǧynan aiyru jazasyna kesıldı. Al 2024 jyldyŋ säuırınde Astanada būrynǧy äskeri qyzmetker Kamil Kasimov ūstaldy. Qūqyq qorǧauşylardyŋ mälımetınşe, ol aldymen Qaraǧandy oblysyndaǧy Priozersk qalasyndaǧy äskeri bölımge jetkızılıp, keiın Ombyǧa jöneltılgen. Onda äskeri kezeŋdegı dezertirlık ısı boiynşa alty jylǧa qataŋ rejimdegı koloniiaǧa sottalǧan.
