فوتو: وزبەكستان پرەزيدەنتىنىڭ ءباسپاسوز قىزمەتى
وزبەكستاندا 2027 جىلدان باستاپ مەملەكەتتىك بيۋدجەت ەسەبىنەن جۇزەگە اسىرىلاتىن قۇرىلىس جوبالارىندا نەگىزىنەن جەرگىلىكتى وندىرىستەن شىققان قۇرىلىس ماتەريالدارىن پايدالانۋ ءتارتىبى ەنگىزىلەدى. بۇل تۋرالى ەل پرەزيدەنتى شاۆكات ميرزيوەۆ تاشكەنت وبلىسىنىڭ پاركەنت اۋدانىندا كاسىپكەرلەرمەن كەزدەسۋدە ايتى، دەپ حابارلايدى “ادىرنا”.
مەملەكەت باسشىسىنىڭ ايتۋىنشا، وتاندىق قۇرىلىس ماتەريالدارىن وندىرەتىن كاسىپورىندار ءۇشىن مەملەكەتتىك ساتىپ الۋ پورتالىندا ارنايى ساۋدا الاڭى اشىلادى. سونىمەن قاتار جاڭا تاشكەنت قالاسىنداعى قۇرىلىس سالۋشىلارعا جەرگىلىكتى ونىمدەردى ساتىپ الۋ ماقساتىندا 200 ميلليون دوللار كولەمىندە نەسيە جەلىسى ۇسىنىلادى.
قۇرىلىس ماتەريالدارىنىڭ ساپاسىن باقىلاۋ جانە حالىقتى قاۋىپتى ونىمدەردەن قورعاۋ ءۇشىن تاشكەنت، فەرعانا جانە سامارقاند قالالارىندا زاماناۋي سىناق زەرتحانالارى قۇرىلادى. بۇدان بولەك، جوبالاۋ ينستيتۋتتارىنىڭ جۇمىسىن قايتا ۇيىمداستىرۋ، سالاعا جاڭا تەحنولوگيالاردى ەنگىزۋ جانە جەكە ينۆەستورلاردى تارتۋ مىندەتى قويىلدى.
پرەزيدەنتتىڭ مالىمەتىنشە، سوڭعى ون جىلدا قۇرىلىس ماتەريالدارىن ءوندىرۋ سالاسىنا 12 ميلليارد دوللار ينۆەستيتسيا تارتىلىپ، 5 مىڭنان استام زاۋىت ىسكە قوسىلعان. بيىلعى جىلدىڭ قورىتىندىسى بويىنشا ءوندىرىس كولەمى 65 تريلليون سۋمعا (شامامەن 5,5 ميلليارد دوللار), ال ەكسپورت كولەمى 1,5 ميلليارد دوللارعا جەتەدى دەپ كۇتىلۋدە.
شاۆكات ميرزيوەۆ الداعى جىلدارى قۇرىلىس ماتەريالدارى ەكسپورتىنىڭ كولەمىن 5 ميلليارد دوللارعا دەيىن ارتتىرۋعا مۇمكىندىك بار ەكەنىن اتاپ ءوتتى. بۇل ءۇشىن قوسىلعان قۇنى جوعارى ءونىم ءوندىرىسىن ۇلعايتۋ، وزبەك كاسىپورىندارىن شەتەلدە قولداۋ جانە لوگيستيكالىق مۇمكىندىكتەردى كەڭەيتۋ كوزدەلىپ وتىر.
سونىمەن بىرگە پرەزيدەنت قۇرىلىس ماتەريالدارىنىڭ ساپاسى مەن باسەكەگە قابىلەتتىلىگىن ارتتىرۋ قاجەتتىگىن ايتتى. ويتكەنى كەيبىر ءونىم تۇرلەرىنىڭ يمپورتى ءالى دە جوعارى دەڭگەيدە قالىپ وتىر. قازىرگى تاڭدا ونىڭ جىلدىق كولەمى 780 ميلليون دوللاردى قۇرايدى.
مەملەكەت باسشىسى قۇرىلىس جۇمىستارىنىڭ وزىندىك قۇنىن تومەندەتۋ جانە بيۋدجەت قاراجاتىن ءتيىمدى پايدالانۋ ماسەلەسىنە دە نازار اۋداردى. ونىڭ ايتۋىنشا، ءارتۇرلى وڭىرلەردە بىردەي نىسانداردىڭ قۇرىلىسىنا جۇمسالاتىن قاراجات كولەمى ايتارلىقتاي ەرەكشەلەنەدى. بۇعان دەلدالداردىڭ كوپتىگى مەن جوبالىق-سمەتالىق قۇجاتتارعا بىرنەشە رەت وزگەرىس ەنگىزىلۋى سەبەپ بولىپ وتىر.
كەزدەسۋ بارىسىندا تۋريزم سالاسىن دامىتۋ ماسەلەلەرى دە تالقىلاندى. پرەزيدەنتتىڭ دەرەگىنشە، جىل باسىنان بەرى وزبەكستانعا 11,6 ميلليون شەتەلدىك تۋريست بارعان. سوڭعى ەكى جىلدا تۋريستەردىڭ ەلدە ورتاشا بولۋ مەرزىمى 6,5 كۇننەن 8 كۇنگە دەيىن ۇزارعان. ال تولەم قابىلەتى جوعارى ساياحاتشىلاردىڭ ۇلەسى 14 پايىزدان 21 پايىزعا وسكەن. ءبىر ءتۋريستىڭ ورتاشا شىعىنى دا 21 پايىزعا ارتقان.
وسىعان بايلانىستى ەندى تۋريستىك قىزمەتتەردىڭ ساپاسىن ارتتىرۋعا باسىمدىق بەرىلمەك. بۇل باعىتتا كاسىپكەرلەرگە كورسەتىلەتىن قولداۋ شارالارى كەڭەيتىلىپ، قوناقۇيلەر سالۋعا قارجى بولىنەدى. سونداي-اق سالاعا ارنالعان سالىقتىق جەڭىلدىكتەر ساقتالادى.
وزبەكستان الداعى ۋاقىتتا شەتەلدىك تۋريستەر سانىن 20 ميلليونعا جەتكىزۋدى، ءتۋريزمنىڭ ەكونوميكاداعى ۇلەسىن 7 پايىزعا دەيىن ارتتىرۋدى جانە قىزمەتتەر ەكسپورتىن 10 ميلليارد دوللارعا جەتكىزۋدى جوسپارلاپ وتىر.
بۇدان بولەك، شاۆكات ميرزيوەۆ 25–27 قاراشا كۇندەرى تاشكەنتتە حالىقارالىق تۋريستىك ينۆەستيتسيالىق فورۋم وتەتىنىن ەسكە سالدى. جيىنعا 25-تەن استام ەلدەن 100-دەن اسا ءىرى ينۆەستور قاتىسادى دەپ كۇتىلۋدە. پرەزيدەنت فورۋم اياسىندا ناقتى كەلىسىمدەرگە قول جەتكىزىپ، ولاردى بولاشاقتا ينۆەستيتسيالىق جوبالارعا اينالدىرۋ مىندەتىن قويدى.
