قىرعىزستان مينيسترلەر كابينەتى قىتايدىڭ CITIC Merchant كومپانياسى جانە قىرعىزستاندىق «مودۋل حاۋس» جشس-پەن «اسمان» ەكولوگيالىق تازا قالاسىن سالۋ جوباسى بويىنشا ينۆەستيتسيالىق كەلىسىمدى رەسمي تۇردە بۇزدى، دەپ حابارلايدى "ادىرنا" ۇلتتىق پورتالى.
ءتيىستى قۇجاتقا 23 ءساۋىر كۇنى پرەمەر-مينيستر ادىربەك قاسىماليەۆ قول قويعان.
قۇجاتتا 2024 جىلعى 13 قاراشادا قابىلدانعان №724-ر ساندى ۇكىمەت قاۋلىسى ءوز كۇشىن جويعانى اتاپ وتىلگەن. الايدا كەلىسىمدى بۇزۋ سەبەبى ناقتى كورسەتىلمەگەن.
بۇعان دەيىنگى كەلىسىمگە سايكەس، قىتايلىق قارجى-ونەركاسىپتىك كونگلومەرات CITIC Merchant جانە قىرعىزستاندا تىركەلگەن، تۇرعىن جانە تۇرعىن ەمەس عيماراتتار سالۋمەن اينالىساتىن «مودۋل حاۋس» كومپانياسى جوباعا 480 ميلليون دوللار ينۆەستيتسيا سالۋى ءتيىس ەدى. ولارعا ىستىقكول وبلىسى، تامشى اۋىلدىق ايماعىنان 4015 گەكتار جەر 49 جىل مەرزىمگە بەرىلگەن. قۇرىلىستى 2024 جىلعى 1 جەلتوقساننان كەشىكتىرمەي باستاۋ جوسپارلانعان بولاتىن.
جوبا اياسىندا زاماناۋي ينفراقۇرىلىمى بار ەكولوگيالىق تازا قالا سالۋ كوزدەلگەن. قۇرىلىس اياقتالعان سوڭ CITIC Merchant پەن «مودۋل حاۋس» 49 جىلعا وبەكتىلەردى يەلەنىپ، باسقارۋ قۇقىعىنا يە بولماق. ال قۇرىلىس نىساندارىنىڭ 10 پايىزى مەملەكەت مەنشىگىنە وتەتىن ەدى.
ايتا كەتەيىك، 2023 جىلدىڭ ماۋسىم ايىندا قىرعىزستان پرەزيدەنتى سادىر جاپاروۆ اسمان قالاسىنىڭ قۇرىلىسىن سالتاناتتى تۇردە باستاپ، ارنايى كاپسۋلا سالعان بولاتىن. 2024 جىلدىڭ قاراشاسىندا ۇكىمەت تاراپىنان 480 ملن دوللار بولىنەتىنى حابارلانعان. جوبانىڭ جالپى قۇنى شامامەن 20 ميلليارد دوللار دەپ باعالانعان، قۇرىلىس مەرزىمى – 7-8 جىل.
