Qyrǧyzstan ministrler kabinetı Qytaidyŋ CITIC Merchant kompaniiasy jäne qyrǧyzstandyq «Modul Haus» JŞS-pen «Asman» ekologiialyq taza qalasyn salu jobasy boiynşa investisiialyq kelısımdı resmi türde būzdy, dep habarlaidy "Adyrna" ūlttyq portaly.
Tiıstı qūjatqa 23 säuır künı premer-ministr Adyrbek Qasymaliev qol qoiǧan.
Qūjatta 2024 jylǧy 13 qaraşada qabyldanǧan №724-r sandy ükımet qaulysy öz küşın joiǧany atap ötılgen. Alaida kelısımdı būzu sebebı naqty körsetılmegen.
Būǧan deiıngı kelısımge säikes, qytailyq qarjy-önerkäsıptık konglomerat CITIC Merchant jäne Qyrǧyzstanda tırkelgen, tūrǧyn jäne tūrǧyn emes ǧimarattar salumen ainalysatyn «Modul Haus» kompaniiasy jobaǧa 480 million dollar investisiia saluy tiıs edı. Olarǧa Ystyqköl oblysy, Tamşy auyldyq aimaǧynan 4015 gektar jer 49 jyl merzımge berılgen. Qūrylysty 2024 jylǧy 1 jeltoqsannan keşıktırmei bastau josparlanǧan bolatyn.
Joba aiasynda zamanaui infraqūrylymy bar ekologiialyq taza qala salu közdelgen. Qūrylys aiaqtalǧan soŋ CITIC Merchant pen «Modul Haus» 49 jylǧa obektılerdı ielenıp, basqaru qūqyǧyna ie bolmaq. Al qūrylys nysandarynyŋ 10 paiyzy memleket menşıgıne ötetın edı.
Aita keteiık, 2023 jyldyŋ mausym aiynda Qyrǧyzstan prezidentı Sadyr Japarov Asman qalasynyŋ qūrylysyn saltanatty türde bastap, arnaiy kapsula salǧan bolatyn. 2024 jyldyŋ qaraşasynda ükımet tarapynan 480 mln dollar bölınetını habarlanǧan. Jobanyŋ jalpy qūny şamamen 20 milliard dollar dep baǧalanǧan, qūrylys merzımı – 7-8 jyl.
