Bügın Türkıstan qalasynyŋ äkımı Äzımbek Pazylbekūlynyŋ töraǧalyǧymen kezektı apparattyq jiyn ötıp, jol infraqūrylymyn damytu josparynyŋ oryndalu barysy jäne merdıger ūiymdardyŋ jūmysyna baqylau men qalanyŋ 6 sektory boiynşa özektı mäseleler qaraldy.
Qazırgı taŋda qalada 845 şaqyrym jol men 875 köşe bar. Ötken jyldyŋ qorytyndysy boiynşa olardyŋ 50,3%-y jaqsy jäne qanaǧattanarlyq jaǧdaida.
Biyl qosymşa 138,5 şaqyrym joldy jöndeu josparlanuda. Būl jūmystar tolyq ıske asyrylǧan jaǧdaida jaqsy jaǧdaidaǧy joldardyŋ ülesı 66,7%-ǧa jetedı dep kütılude.
Qala äkımı oryndalyp jatqan jūmystardyŋ sapasy men qarqynyna bailanysty bırqatar syn-eskertpeler aitty. Atap aitqanda, jöndeu jūmystarynyŋ baiau jürgızılıp jatqany, ışkı köşelerdıŋ nazardan tys qaluy jäne jobalyq-smetalyq qūjattar men biudjetteu barysynda jüielı kemşılıkterdıŋ bar ekendıgı aityldy.
Mäjılıs barysynda jol infraqūrylymyna qatysty tūrǧyndar tarapynan tüsken şaǧymdarǧa erekşe nazar audaryldy. 2025 jyldyŋ 27–29 mamyr aralyǧynda ötken qoǧamdyq qabyldaular barysynda 171 mäsele köterılıp, sonyŋ 52-sı jol mäselelerıne qatysty bolǧan. Būl – är üşınşı şaǧym jol sapasyna bailanysty ekenın bıldıredı.
— «Köşeler jöndelıp jatyr, jobalar jasaluda – bıraq tūrǧyn sūranysy men jospardyŋ arasynda bailanys joq. Qala aumaǧynda jaŋadan asfalt töselıp jatqan köşelerge jol belgılerı uaqytyly ornatylmai otyr. Būl – eŋ aldymen jol-kölık oqiǧalaryna alyp keletın tıkelei qauıp. Būdan bylai jol jöndeu men jol qauıpsızdıgı şaralary — bırtūtas prosess retınde qaraluy tiıs. Jol bar, bıraq belgı joq degen jaǧdaiǧa mülde jol berılmesın», — dedı qala äkımı.
Sonymen qatar, monitoring jäne jedel äreket etu ortalyǧynyŋ jūmys nätijesınde anyqtalǧan özektı mäseleler taldanyp, qala aumaǧyndaǧy retsız sauda men jarnamalardy retke keltıru, salyq tölemderın öndıru, käsıpkerlermen jüielı jūmys jürgızu, sondai-aq deputattyq saualdarǧa berıletın jauaptardyŋ tūrǧyndarǧa da qoljetımdı boluyn qamtamasyz etu jönınde naqty tapsyrmalar berıldı.
Qala äkımı Äzımbek Pazylbekūly barlyq berılgen tapsyrmalardyŋ oryndaluyn jeke baqylauyna alatynyn, jol-kölık infraqūrylymy, qoǧamdyq qauıpsızdık jäne qala tazalyǧy tūrǧyndardyŋ ömır sapasyna tıkelei äser etetın negızgı basym baǧyttar ekenın atap öttı.
Ūqsas jaŋalyqtar
