ۇلىتاۋ وبلىسىنىڭ اكىمى ەسەت بايكەن جۇمىس ساپارىمەن جاڭاارقا اۋدانىنا بارىپ، ءوڭىردىڭ ينفراقۇرىلىمدىق جانە وندىرىستىك الەۋەتىن ارتتىرۋعا باعىتتالعان بىرقاتار جوبالاردىڭ جۇزەگە اسىرىلۋ بارىسىمەن تانىستى.
ءوڭىر باسشىسى الدىمەن جاڭاارقا كەنتىندەگى ەلەكتر قوسالقى ستانتسياسىنىڭ قۇرىلىسىن ارالاپ، اتقارىلىپ جاتقان جۇمىستاردىڭ ساپاسى مەن قارقىنىن باقىلاپ، جاۋاپتى تۇلعالارعا نىساندى بەلگىلەنگەن مەرزىمدە پايدالانۋعا بەرۋ جونىندە ناقتى تاپسىرمالار جۇكتەدى.
سونداي-اق وبلىس اكىمى اۆتوماتتاندىرىلعان گاز تاراتۋ ستانتسياسىنىڭ قۇرىلىسىمەن تانىستى. بۇل جوبا اۋدان تۇرعىندارىن تابيعي گازبەن تۇراقتى قامتاماسىز ەتۋگە جانە ءوڭىردىڭ ينجەنەرلىك ينفراقۇرىلىمىن نىعايتۋعا مۇمكىندىك بەرەدى.
جۇمىس ساپارى بارىسىندا وبلىس اكىمى ەسەت بايكەن تۇراقتى تۇقىمباقتىڭ جۇمىسىن كورىپ، كوگالداندىرۋ مەن اباتتاندىرۋ باعىتىنداعى جوسپارلاردى تالقىلادى. سونىمەن قاتار 48 پاتەرلى كوپقاباتتى تۇرعىن ۇيلەردىڭ قۇرىلىسىن باقىلاپ، مەردىگەر ۇيىمدارعا قۇرىلىستىڭ ساپاسى مەن مەرزىمىنە ەرەكشە جاۋاپكەرشىلىكپەن قاراۋدى تاپسىردى.
ءوڭىر باسشىسى ساپار اياسىندا «ORYNBAI MEAT» اۋىل شارۋاشىلىعى وندىرىستىك كووپەراتيۆىنىڭ قىزمەتىمەن دە تانىستى. كاسىپورىننىڭ وندىرىستىك الەۋەتى، اۋىل شارۋاشىلىعى ونىمدەرىن وڭدەۋ باعىتىنداعى جۇمىستارى مەن الداعى دامۋ جوسپارلارى قاراستىرىلدى.
ساپار قورىتىندىسى بويىنشا وبلىس اكىمى بارلىق جوبانىڭ ۋاقىتىلى ءارى ساپالى اياقتالۋى ءوڭىردىڭ الەۋمەتتىك-ەكونوميكالىق دامۋىنا سەرپىن بەرەتىنىن اتاپ ءوتىپ، جاۋاپتى مەكەمەلەرگە ءار نىسان بويىنشا جۇمىستى كۇشەيتىپ، بەلگىلەنگەن كەستەدەن كەشىكپەۋدى تاپسىردى.
