23 جەر تەلىمىن جەكە مەنشىككە زاڭسىز بەرگەن: زاڭگەر ورالدىڭ ەكس-اكىمىن سوتقا بەرۋدى تالاپ ەتتى

2619
Adyrna.kz Telegram
فوتو: ratel.kz
فوتو: ratel.kz

زاڭگەر باقىتجان بازاربەك ورالدىڭ بۇرىنعى اكىمىن «23 جەر تەلىمىن جەكە مەنشىككە زاڭسىز بەردى» دەگەن ايىپپەن جاۋاپقا تارتۋدى تالاپ ەتەدى. بۇل تۋرالى ول ءوزىنىڭ Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.

«سوت ورال قالاسىنىڭ اكىمدىگى «اقجايىق» اكك باسشىلىعىمەن بىرلەسىپ، 2019 جىلدىڭ جەلتوقسانىنان 2021 جىلدىڭ قىركۇيەگىنە دەيىن «ينۆەستيتسيالىق جوبالاردى جۇزەگە اسىرۋ ءۇشىن» دەگەن جەلەۋمەن 23 جەر تەلىمىن، جەر كودەكسىنىڭ 48-بابىن بۇزا وتىرىپ، مجك (از قاباتتى تۇرعىن ءۇي كەشەندەرى), جانار-جاعارماي قۇيۋ ستانتسيالارى، اۆتوكەشەندەر جانە باسقا دا كوممەرتسيالىق نىسانداردىڭ قۇرىلىسى ءۇشىن بىرقاتار اج جانە جشس-ءىن زاڭسىز بەرگەنىن انىقتادى.»، - دەپ جازادى زاڭگەر باقىتجان بازاربەك ءوز پاراقشاسىندا.

ونىڭ ايتۋىنشا، جەر تەلىمدەرى كاداسترلىق قۇنى بويىنشا ودان ءارى ساتىپ الۋ قۇقىعىمەن جەكەنىڭ قولىنا ءوتىپ، جەر تەلىمدەرى بەرىلگەن ينۆەستيتسيالىق جوبالار جۇزەگە اسپاي قالعان.

فوتو: Facebook/ باقىتجان بازاربەك

بازاربەك «اقجايىق» اكك-گە قاتىستى «قىزمەتتىك وكىلەتتىكتەردى اسىرا پايدالانۋ» بابى بويىنشا ءىس قوزعالعانىن ايتادى. ادۆوكات ورال قالاسىنىڭ بۇرىنعى اكىمىن جاۋاپقا تارتۋدى تالاپ ەتەدى.

بۇعان دەيىن زاڭگەر باقىتجان بازاربەك ورالدا «كۋبلەي» كونسەرۆى زاۋىتىنىڭ ماڭىندا ورنالاسقان «تسيولكوۆسكي» تۇرعىن ءۇي كەشەنىن سالۋ كەزىندە ۇلكەن جانجال شىققان كەزدە جەر تەلىمدەرىنىڭ زاڭسىز بەرىلگەنىن مالىمدەگەن بولاتىن.

«ادىرنا» ۇلتتىق پورتالى

پىكىرلەر