پرەزيدەنت تاپسىرماسى بويىنشا ۇلىتاۋ وبلىسىندا 25-تەن استام ءىرى الەۋمەتتىك جانە ينجەنەرلىك-كوممۋنيكاتسيالىق ينفراقۇرىلىم جوبالارى جۇزەگە اسىرىلادى. بۇل تۋرالى ۇلىتاۋ وبلىسىنىڭ اكىمى ەسەت بايكەن سۇحبات بارىسىندا مالىمدەدى.
ۇكىمەتتىڭ قولداۋىمەن وڭىردە الەۋمەتتىك جانە ينجەنەرلىك-كوممۋنيكاتسيالىق ينفراقۇرىلىمدى دامىتۋعا باعىتتالعان 25-تەن استام ءبىرىنشى كەزەكتەگى جوبانى كەزەڭ-كەزەڭىمەن جۇزەگە اسىرۋ جۇمىستارى باستالدى. اتالعان جوبالار ۇلتتىق كومپانيالار جانە ءىرى بيزنەس وكىلدەرىمەن بىرلەسىپ ىسكە اسىرىلادى.
ءوڭىردىڭ ستراتەگيالىق سەرىكتەستەرىنىڭ ءبىرى – «قازاقمىس كورپوراتسياسى» جشس. وبلىس اكىمدىگى مەن كورپوراتسيا اراسىندا جەزقازعان قالاسىندا زاماناۋي تەننيس ورتالىعىن سالۋدى جانە 6 مىڭ كورەرمەنگە ارنالعان جاڭا جابىق فۋتبول ستاديونىن جوبالاۋدى كوزدەيتىن مەموراندۋمعا قول قويىلدى.
وبلىس اكىمىنىڭ ايتۋىنشا، جاڭا سپورت نىساندارى تۇرعىندارعا، اسىرەسە بالالار مەن جاستارعا سپورتپەن شۇعىلدانۋعا قوسىمشا مۇمكىندىكتەر بەرەدى.
