ەمتيحاندا جي قولدانۋ داۋى. وڭتۇستىك كورەيا ءمينيسترى قىزمەتىنەن كەتتى

300
Adyrna.kz Telegram
https://www.adyrna.kz/storage/uploads/soOmGUCWqRmdmCj0ey0dVa41swlGBJefr2FY1TVu.jpg

فوتو: Yonhap.news

وڭتۇستىك كورەيا پرەزيدەنتى لي چجە ميون ءبىلىم ءمينيسترى چحۆە گيو ءچجيننىڭ وتستاۆكاسىن قابىلدادى. بۇعان مەملەكەتتىك ءبىتىرۋ ەمتيحاندارىندا جاساندى ينتەللەكت (جي) كومەگىمەن كوشىرۋدىڭ الدىن الۋ شارالارى جەتكىلىكسىز بولعانى تۋرالى قوعامنىڭ نارازىلىعى سەبەپ بولدى، دەپ حابارايدى "ادىرنا".

مەملەكەت باسشىسىنىڭ اكىمشىلىگى ءمينيستردىڭ ءوز ەركىمەن قىزمەتىنەن كەتۋگە ءوتىنىش بىلدىرگەنىن حابارلادى. 

«پرەزيدەنت لي چجە ميونگە ءبىلىم ءمينيسترى چحۆە گيو ءچجيننىڭ قىزمەتىنەن كەتۋگە نيەت بىلدىرگەنى تۋرالى باياندالدى. پرەزيدەنت ونىڭ وتستاۆكاسىن قابىلدادى. ەندى ءبىلىم ءمينيسترى لاۋازىمىنا ۇمىتكەرلەردى ىرىكتەۋ باستالادى»، – دەپ حابارلادى مەملەكەت باسشىسىنىڭ اكىمشىلىگى.

سونىمەن قاتار پرەزيدەنت پرەمەر-مينيستر حان سون سۋككە ەمتيحانداردا ءبىلىمدى ءادىل باعالاۋدى قامتاماسىز ەتەتىن قوسىمشا شارالار ازىرلەۋدى تاپسىردى.

بۇعان دەيىن چحۆە گيو چجين بيلىك تەستىلەۋ كەزىندە جاساندى ينتەللەكتىنى پايدالانۋ قاۋپىنە الدىن الا دايىندالماعانىن مويىنداعان. ونىڭ ايتۋىنشا، ەمتيحان وتكىزۋ تارتىبىنە سوڭعى ساتتە ەنگىزىلگەن وزگەرىستەر قاتىسۋشىلار اراسىندا تۇسىنبەۋشىلىك پەن قولايسىزدىق تۋدىرۋى مۇمكىن.

ايتا كەتەيىك، 19 قاراشادا وڭتۇستىك كورەيادا مەكتەپ بىتىرۋشىلەرگە ارنالعان بىرىڭعاي مەملەكەتتىك ەمتيحان وتكەن. بيىل تەستىلەۋ كەزىندە جاساندى ينتەللەكتىنى جاپپاي پايدالانۋ مۇمكىندىگى قوعامدا ۇلكەن الاڭداۋشىلىق تۋعىزعان. اسىرەسە، مۇنداي زاڭبۇزۋشىلىقتاردىڭ الدىن الۋ تەتىكتەرىنىڭ جەتكىلىكسىزدىگى سىنعا ۇشىرادى.

بۇعان دەيىن، 15 قاراشادا سالىق كەڭەسشىلەرىنە ارنالعان ەمتيحاندا ەڭ جوعارى ناتيجە كورسەتكەن ۇمىتكەردىڭ شاعىن كامەرا مەن جاساندى ينتەللەكتىنى پايدالانىپ، تەست تاپسىرعانى انىقتالعان. كەيىن ول بۇل ارەكەتىن ءوزى مويىنداعان. بۇل وقيعا ەمتيحان كەزىندەگى باقىلاۋ جۇيەسىنە قاتىستى پىكىرتالاستى كۇشەيتتى.

پىكىرلەر