سەنات دەپۋتاتتارى 25 قازان ۇلتتىق مەرەكە – رەسپۋبليكا كۇنىن قايتارۋ تۋرالى شەشىمدى قولدادى، دەپ جازادى "ادىرنا" ۇلتتىق پورتالى.
نورما «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ەنگىزىلگەن.
"25 قازان ۇلتتىق مەرەكە – رەسپۋبليكا كۇنى بولىپ بەكىتىلەدى. بۇل تاريحي، وتە ماڭىزدى شەشىم. ءبىزدىڭ ەلىمىزدىڭ تاۋەلسىزدىگى شىن مانىندە وسى كۇننەن باستالادى. سوندىقتان بۇل كۇندى ۇلتتىق مەرەكە رەتىندە بەكىتۋ – مەملەكەتتىلىك پەن ەگەمەندىك تۇرعىسىنان العاندا ماڭىزدى قادام", – دەدى سەنات توراعاسى ماۋلەن اشىمباەۆ.
«قازاقستان رەسپۋبليكاسىنداعى مەرەكەلەر تۋرالى» زاڭعا كەلەسىدەي وزگەرىستەر ەنگىزۋ جوسپارلانىپ وتىر:
25 قازاندى ۇلتتىق مەرەكە – رەسپۋبليكا كۇنى دەپ بەلگىلەۋ;
16 جەلتوقسان مەملەكەتتىك مەرەكە – تاۋەلسىزدىك كۇنى رەتىندە بەكىتۋ;
"ادىرنا" ۇلتتىق پورتالى
