سمايىلوۆ: يمپورتقا تاۋەلدىلىكتى ازايتىپ، وتاندىق ماشينا جاساۋ سالاسىن دامىتامىز!

1490
Adyrna.kz Telegram

 قر پرەمەر-ءمينيسترى ءاليحان سمايىلوۆ استانادا ماشينا جاساۋ جانە مەتالل وڭدەۋ جونىندەگى ەكىنشى حالىقارالىق مامانداندىرىلعان «Kazakhstan Machinery Fair» كورمەسى اياسىندا وتكەن قازاقستان ماشينا جاساۋشىلارىنىڭ X فورۋمىنىڭ پلەنارلىق وتىرىسىنا قاتىستى، دەپ جازادى "ادىرنا" ۇلتتىق پورتالى. 

فورۋمنىڭ اشىلۋىندا پرەمەر-مينيستر ءاليحان سمايىلوۆ مەملەكەت باسشىسى قاسىم-جومارت توقاەۆتىڭ قۇتتىقتاۋ ءسوزىن وقىپ بەردى.

«قۇرمەتتى جيىنعا قاتىسۋشىلار! سىزدەردى قازاقستان ماشينا جاساۋشىلارىنىڭ X فورۋمىنىڭ اشىلۋىمەن قۇتتىقتايمىن! بۇل – مەملەكەت پەن بيزنەس وكىلدەرىن وسى سالانى دامىتۋدىڭ تىڭ تاسىلدەرىن تابۋعا جۇمىلدىراتىن بەدەلدى ديالوگ الاڭى.

ەلىمىزدە وڭدەۋ ونەركاسىبىنە جانە ماشينا جاساۋ ىسىنە قولداۋ كورسەتىلىپ، قولايلى جاعداي جاسالىپ وتىر. سونىڭ ناتيجەسىندە قازاقستان كومپانيالارى جۇك جانە جولاۋشىلار ۆاگوندارى، اۆتوكولىك، اۆتوبۋس، ەلەكتروۆوز، ترانسفورماتور سياقتى جاڭا ونىمدەر شىعارۋدى مەڭگەرۋدە.

ەكسپورتقا باعىتتالعان ءوندىرىستى دامىتۋعا جانە جەرگىلىكتى تاۋار وندىرۋشىلەردى قولداۋعا ارنالعان باعدارلاما جۇزەگە اسىرىلا باستادى. «ونەركاسىپتىك ساياسات تۋرالى» زاڭ قابىلدانىپ، وسى سالانىڭ نەگىزى باسىمدىقتارى جانە دامۋ باعدارى ايقىندالدى. بۇگىندە وتاندىق ماشينا جاساۋشىلار ءوز ونىمدەرىن سىرتقى نارىققا دا شىعارىپ جاتقانى قۋانتادى. ەكسپورت كولەمى قازىردىڭ وزىندە $2 ملرد-قا جەتتى.

بۇل سالانىڭ الەۋەتىن تولىق پايدالانۋ ارقىلى ەلىمىزدىڭ ەكونوميكاسىن وركەندەتۋگە، تەحنولوگياسىن دامىتۋعا جانە الەۋمەتتىك وزگەرىستەر جاساۋعا جول اشىلادى دەپ سەنەمىن. بارشاڭىزعا تولاعاي تابىس تىلەيمىن!»، — دەلىنگەن قر پرەزيدەنتىنىڭ قۇتتىقتاۋ سوزىندە.

ءوز كەزەگىندە ءاليحان سمايىلوۆ وتاندىق ماشينا جاساۋ سالاسىنىڭ رەسپۋبليكا ەكونوميكاسىنىڭ تۇراقتى دامۋىنا ەلەۋلى ۇلەس قوسىپ كەلە جاتقانىن ايتىپ ءوتتى. ماسەلەن، يندۋستريالاندىرۋ جىلدارىندا ماشينا جاساۋداعى ءوندىرىس كولەمى 6 ەسەگە ءوسىپ، 2,3 ترلن تەڭگەگە دەيىن كوتەرىلدى. سالانىڭ ءوسىمى سوڭعى 3 جىلدا ورتا ەسەپپەن 20%-دى قۇراپ وتىر.

«قازىرگى تاڭدا ۇكىمەت وتاندىق وندىرۋشىلەردى قولداۋعا باعىتتالعان جۇمىستاردى جالعاستىرۋدا. بۇل – قولجەتىمدى باستاپقى ماتەريالدارمەن جانە قارجىلاندىرۋمەن قامتاماسىز ەتۋ، سونىمەن بىرگە يمپورتقا تاۋەلدىلىكتى ازايتۋ، جاڭا وندىرىستەردى قۇرۋ جانە جۇمىس ىستەپ تۇرعان ءوندىرىس ورىندارىن جاڭعىرتۋ»،— دەدى ءاليحان سمايىلوۆ. سونىمەن قاتار ول ۇكىمەتتىڭ اشىق ديالوگقا جانە بيزنەسپەن بىرلەسىپ جۇمىس ىستەۋگە دايىن ەكەنىن ايتتى.

پلەنارلىق وتىرىس اياسىندا ءاليحان سمايىلوۆ سۇراق-جاۋاپ سەسسياسىنا قاتىستى، وندا ۇكىمەت باسشىسى ماشينا جاساۋ ونىمدەرىن يمپورتتاۋ جانە شەتەلدىك كومپانيالاردىڭ قازاقستانعا كوشۋى تۋرالى ءوز پىكىرىن ءبىلدىردى.

«بىزدە بۇگىندە ەكسپورتقا قاراعاندا يمپورتتىڭ ۇلەسى باسىم. بۇل جاعداي كەرىسىنشە بولۋى كەرەك. ماسەلەنى شەشۋ ءۇشىن جۇيەلى جانە كەشەندى شارالار قابىلداۋ قاجەت. ماشينا جاساۋ سالاسىن دامىتۋدىڭ كەشەندى جوسپارى باعدارلامالىق قۇجاتىن ازىرلەۋ جانە قابىلداۋ تۋرالى ويلاناتىن كەز كەلدى. سەبەبى ۇزاق مەرزىمدى تاسىلدەر عانا وسى باعىتتا ايتارلىقتاي ناتيجەلەرگە قول جەتكىزۋگە مۇمكىندىك بەرەدى»، — دەدى ءاليحان سمايىلوۆ.

سونىمەن قاتار پرەمەر-مينيستر «Kazakhstan Machinery Fair» كورمەسىنىڭ ەكسپوزيتسياسىمەن تانىستى، وندا 17 ەلدىڭ 240-تان استام كومپانياسى ءوز ونىمدەرى مەن تەحنولوگيالارىن ۇسىندى. ولار: قازاقستان، اۆستريا، بەلارۋس، گەرمانيا، دانيا، يزرايل، يسپانيا، يتاليا، رەسەي، تۇركيا، وزبەكستان، فرانتسيا، چەحيا، شۆەيتساريا، شۆەتسيا، وڭتۇستىك كورەيا جانە يران.

ودان بولەك، ءاليحان سمايىلوۆ تۇركيانىڭ «MAKFED» ماشينا جاساۋ فەدەراتسياسىنىڭ توراعاسى ادنان دالگاكيرانمەن كەزدەستى، وندا ۇكىمەت باسشىسى تۇرىك كومپانيالارىن بەلسەندى تۇردە ينۆەستيتسيا سالىپ، قازاقستاندا ءوز وندىرىستەرىن اشۋعا شاقىردى.

«ءبىزدىڭ ەلىمىز تاجىريبەسى مول تۇرىك كومپانيالارىمەن ماشينا جاساۋ سالاسىنداعى بىرلەسكەن جوبالاردى ىسكە اسىرۋعا مۇددەلى»، — دەدى پرەمەر-مينيستر.

"ادىرنا" ۇلتتىق پورتالى 

پىكىرلەر