الماتىدا«NEW SILK WAY» V حالىقارالىق كولىك-لوگيستيكالىق بيزنەس فورۋمى ءوتتى

1678
Adyrna.kz Telegram

الماتى قالاسىندا قازاقستاننىڭ كولىك اپتالىعى شەڭبەرىندە «NEW SILK WAY» V حالىقارالىق كولىك-لوگيستيكالىق بيزنەس فورۋمى ءوتتى، دەپ حابارلايدى "ادىرنا" ءتىلشىسى. 

شارانىڭ وتۋىنە «KAZLOGISTICS» قازاقستان كولىك قىزمەتكەرلەرىنىڭ وداعى، قر يندۋستريا جانە ينفراقۇرىلىمدىق دامۋ مينيسترلىگى، «قازاقستان تەمىرجولى» ۇق» اق مۇرىندىق بولدى.

«The Ritz-Carlton Almaty» قوناقۇيىندە وتكەن فورۋمدا كولىك سالاسىنداعى جاڭا مۇمكىندىكتەر، حالىقارالىق اۆتوموبيل تاسىمالدارى، تەڭىز جانە تەمىرجول لوگيستيكاسى، ازاماتتىق اۆياتسيانى دامىتۋ جانە سالادا كادرلار دايارلاۋ ماسەلەلەرى تالقىلانادى. جيىنعا تمد، شەتەل مينيسترلەرى، ۆيتسە-مينيسترلەر، بيزنەس قوعامداستىقتىڭ، مەملەكەتتىك جانە جەكە كومپانيالاردىڭ وكىلدەرى قاتىستى.

القالى باسقوسۋدا العاشقى بولىپ ءسوز العان  الماتى قالاسى اكىمىنىڭ ورىنباسارى الىشەر ابدىقادىروۆ جيىنعا قاتىسۋشىلاردىڭ جۇمىسىنا ساتتىلىك تىلەپ، كولىك قاتىناسى مەن جولداردى جاقسارتۋ باعىتىندا وڭتۇستىك استانادا اتقارىلىپ جاتقان جۇمىستارعا توقتالىپ ءوتتى.

ول ءوز سوزىندە ۇلكەن الماتى اينالما جولى مەن ءۇشىنشى تەمىرجول بەكەتىنىڭ اشىلۋىمەن قالاداعى كەپتەلىس ماسەلەسى شەشىلىپ، جولاۋشىلار مەن جۇك تاسىمالى الدەقايدا جاقسارا تۇسەتىنىن تىلگە تيەك ەتتى. وسىدان كەيىن مىنبەرگە كوتەرىلگەن قر يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆ جاھاندانۋ زامانىندا ەلدەر مەن مەملەكەتتەر اراسىنداعى قارىم-قاتىناس پەن بارىس-كەلىستىڭ ماڭىزدىلىعىنا توقتالىپ، فورۋم بارىسىندا بارلىق قاتىسۋشىلارعا ءتيىمدى كەلىسىمشارتتار جاسالاتىنىنا سەنىم ءبىلدىردى. «قازاقستان تەمىرجولى» ۇق» اكتسيونەرلىك قوعامىنىڭ باسقارۋشى ديرەكتورى ەرلان قويشىباەۆ بولسا ەلىمىزدەگى ەڭ ءىرى جولاۋشى جانە جۇك تاسىمالداۋشى قۇرىلىمنىڭ بۇگىنى مەن بولاشاقتاعى مۇمكىندىكتەرى جايلى حابارلاما جاسادى.

كۇن تارتىبىندەگى «ترانسپورت جانە لوگيستيكا ­­­– جاڭا مۇمكىندىكتەر» تاقىرىبى بويىنشا ءسوز سويلەگەن رەسەي فەدەراتسياسى كولىك ءمينيسترىنىڭ ورىنباسارى د.زۆەرەۆ، تۇركيا كولىك جانە ينفراقۇرىلىم ءمينيسترىنىڭ ورىنباسارى ومەر فتيح، بەلارۋس رەسپۋبليكاسىنىڭ كولىك جانە كوممۋنيكاتسيا ءمينيسترىنىڭ ورىنباسارى س.دۋبين، جيىنعا ونلاين قاتىسقان يران جولدار مەن قالاقۇرىلىسى ءمينيسترىنىڭ ورىنباسارى شاحريار ەفەنديزادە، تۇركىمەنستان مينيسترلەر كابينەتى جانىنداعى كولىك جانە كوممۋنيكاتسيا اگەنتتىگى توراعاسىنىڭ ورىنباسارى اقمۇراد حودجاباەۆ، ەۆرازياداعى  IRU تۇراقتى وكىلدىگىنىڭ باسشىسى ۆاديم زاحارەنكو، «تراسەكا» مەملەكەتارالىق كوميسسياسىنىڭ باس حاتشىسى اسەت اساۆباۆ، BCG كومپانياسىنىڭ اتقارۋشى ديرەكتورى گريگوري رۋبيندەر بۇگىنگى كەزەڭنىڭ ەرەكشەلىكتەرىنە توقتالا كەلىپ، مەملەكەتارالىق جانە حالىقارالىق تاسىمالدى جەڭىلدەتۋ، وسى باعىتتا بىرلەسە جۇمىس جاساۋدىڭ ماڭىزدىلىعى جايلى ايتتى.

وسىدان كەيىن جەكە سالالار بويىنشا پانەلدىك سەسسيالار وتكىزىلدى. بۇل ورايدا «قالىپتاسقان جاعدايدا كولىك-لوگيستيكا تاسىمالىن  دامىتۋ»، «حالىقارالىق كولىك تاسىمالى: جاڭا مۇمكىندىكتەر كوكجيەگىندە ارىپتەستىكتى نىعايتۋ»، «مۇحيت لوگيستيكاسى ­– تاۋار اينالىمىنىڭ كوشباسشىسى»، «تەمىرجول لوگيستيكاسى»، «ازاماتتىق اۆياتسيانى دامىتۋ باعىتى»، «جاڭا قازاقستان جاعدايىندا كولىك پەن لوگيستيكانى دامىتۋداعى بىلىم مەن عىلىمنىڭ ءرولى» تاقىرىپتارىندا باياندامالار جاسالىپ، قاتىسۋشىلاردىڭ تالقىلاۋىنا ۇسىنىلدى.

كەلەسى كۇنى «اتاكەنت» ىسكەرلىك بايلانىس ورتالىعىنىڭ 11-ءشى پاۆيلونىندا «قازاقستانداعى قويمالىق لوگيستيكا نارىعى»، «جاڭا جاعدايداعى لوگيستيكا»، «كولىك جانە لوگيستيكالىق نارىق» تاقىرىبىندا باياندامالار تىڭدالىپ، كولىك جانە لوگيستيكا سالاسىنداعى كادرلاردى دايارلاۋ ورتالىقتارىنىڭ تۇساۋكەسەر ءراسىمى بولىپ ءوتتى. وسى جەردە  تۇرلى مەملەكەتتەر دايىنداپ اكەلگەن كورمەلەردى تاماشالاپ، ءوزارا تاجىريبە الماسىپ، ەكىجاقتى ءتيىمدى ارىپتەستىك جونىندە مەموراندۋمدارعا قول قويىلدى. رەسەي مەن ۋكراينا اراسىنداعى سوعىس، وسىعان بايلانىستى رەسەيگە سالىنعان سانكتسيالار جىلدار بويى قالىپتاسقان ەكونوميكالىق بايلانىستاردى بۇزىپ، ىرگەلەس ەلدەرگە كەسىرىن تيگىزىپ جاتقانى جاسىرىن ەمەس. الايدا قازاقستان قيىندىقتى ءوز پايداسىنا اينالدىرىپ، ەۋروپا مەن ازيا قۇرلىعىنىڭ اراسىندا التىن كوپىر مىندەتىن اتقارۋعا تولىق مۇمكىندىگى بار.  بۇل وزگەرىستەر بۇگىندەرى-اق ناتيجەسىن بەرە باستاعانداي.

­­­ «وتكەن جىلدارمەن سالىستىرعاندا قازاقستان مەن لاتۆيا اراسىنداعى جۇك اينالىمىنىڭ كولەمى 23 پايىزعا ارتتى. كولىك اينالىمى، نەگىزىنەن، قازاقستاننان كەلەتىن تەمىرجول، ترانزيتتىك جۇكتەر، اسىرەسە، كومىر ەسەبىنەن ارتقان. سونىمەن قاتار، لاتۆيادان وتەتىن فەرروقورىتپالار دا اينالىمنىڭ وسۋىنە اسەر ەتتى.  ءبىز بيىل تاۋار اينالىمىن تاعى 10%-عا ۇلعايتساق دەپ ويلاپ وتىرمىز. تاسىمالداۋ جاعىنان ازىرگە ەشقانداي قيىندىق جوق، بارلىق ماسەلەنىڭ شەشىمى بار. ينفراقۇرىلىمعا كەلەر بولساق، ول ترانزيتتىك تاسىمالداۋعا قاتىستى بارلىق ماسەلەلەرگە سايكەس كەلەدى»، - دەدى لاتۆيا كولىك ءمينيسترىنىڭ ورىنباسارى ۋلديس رەيمانيس.

ايتا كەتەيىك، فورۋم الماتى شاھارىندا ەكى كۇنگە جالعاستى. قاتىسۋشىلار قازاقستان دەلەگاتسياسىمەن تاسىمالداۋ، جىلدام جانە كەدەندىك قىزمەت كورسەتۋ تاقىرىبىن تالقىلاپ، الداعى ىستەرگە وڭ باعىت الدى.

 

پىكىرلەر