قوعام بەلسەندىسى، جۋرناليست ارمان شوراەۆ ۋكراينانىڭ "Freedom UA" تەلەارناسىندا قازاقستانعا قاشقىنداردىڭ كوپتەپ كەلۋىنە بايلانىستى سۇحبات بەرىپ، پىكىر ءبىلدىردى، دەپ حابارلايدى "ادىرنا" ۇلتتىق پورتالى.
"وكىنىشكە قاراي، قازاقستاننىڭ رەسەيمەن شەكاراسى الەمدەگى ەڭ ۇزىن شەكارا سانالادى. بارشاڭىزعا بەلگىلى، رەسەيدە قازاق جەرىن وزدەرىنە تيەسىلى سانايتىن ازاماتتار بار. ءبىزدىڭ جەرگە كوز تىگىپ، ونى وزدەرىنىڭ تاريحي وتانى سانايدى. ۋكراينادان كەيىن قازاقستانعا باسىپ كىرەمىز دەگەندى ايتادى. ەگەر، شىنىمەن دە، 3 كۇندە كيەۆتى، 7 كۇندە ۋكراينانى باسىپ السا، كەلەسىدە ءبىزدىڭ سولتۇستىك قازاقستانعا باعىت بۇراتىن ەدى. الايدا، جۇرەك جۇتقان ۋكراينا ساربازدارىنىڭ ارقاسىندا ءبىزدىڭ اسپانىمىز اشىق", - دەدى شوراەۆ.
"قازاقستانعا كەلگەن رەسەيلىكتەر وزدەرىنىڭ يمپەريالىق جالاڭ كوزقاراستارىن تانىتا باستادى ما؟" دەگەن ءجۋرناليستىڭ ساۋالىنا ارمان شوراەۆ:
" ازىرگە ونداي ەشتەڭە بايقالعان جوق. بىراق رەسەيدەن كەلگەندەردىڭ سۇيىكتى ءىسى سپيرتتىك ونىمدەردى ءىشۋ ەكەندىگى بەلگىلى. ولار سپيرتتىك ونىمدەردى دۇكەننەن الادى دا، ەل-جۇرتتىڭ كوزىنشە ءىشىپ وتىرا بەرەدى. بۇل ءبىزدىڭ قوعامعا جات. ءبىزدىڭ ءبىر بلوگەر ولارعا "قىرىم كىمگە تيەسىلى؟" دەگەن ساۋال قويدى. ولار بۇلعاقتاپ، تۇلكىبۇلاڭعا سالىپ، قىرىم، دونباس، لۋگانسك دەگەندەر دونباس، لۋگانسك رەسپۋبليكالارىنا تيەسىلى دەپ جاۋاپ بەرىپ جاتتى. وسىلاي ءۇن-ءتۇنسىز سەپاراتيستىك قادامداردى قولدايتىنى كورىنىپ قالىپ جاتىر. قازىرگى قازاقستان 2013 جىلعى ۋكراينا سەكىلدى. باسشىلىقتا دا، اسكەريلەردىڭ اراسىندا دا سەپاراتيستەر كوپ. اسىرەسە، سولتۇستىك جانە شىعىس قازاقستاندا سلاۆيان تۇرعىندارى جەتىپ ارتىلادى", - دەدى قوعامدىق بەلسەندى.
باعدارلاما بارىسىندا ارمان شوراەۆ رەسەيدەن اعىلعان قاشقىندارعا قاتىستى ءوز پىكىرىن ايتتى.
"مەنىڭ قاشقىندارعا ەشقانداي جانىم اشىمايدى. بۇعان ءپۋتيننىڭ فاشيتىك رەجيمىن قولداعان رەسەيلىكتەردىڭ بارلىعى كىنالى. ءۇنسىز قالعاندار دا اسكەردە جازىقسىز ءولىپ، قىرىلعانداردىڭ قانىن ارقالايدى. ءبىز ولارعا بارلىق جەردە "سەندەر بۇل جەردە ۋاقىتشا جۇرسىڭدەر! سەندەرگە ۋكراينالىقتاردىڭ ريزا ەمەس بولعانى سەكىلدى قازاقتىڭ جەرىندە دە ەشكىم ريزا ەمەس" دەپ ايتىپ جاتىرمىز، - دەپ جاۋاپ بەردى.
ءوزىنىڭ پرينتسيپشىلدىگى جانە نىق ۇستانىمىمەن قوعامدىق پىكىر جەتەكشىسىنە اينالعان ارمان شوراەۆ ءسوز سوڭىندا رەسەيدىڭ بۇل قارقىنمەن كەتە بەرەتىن بولسا، ىشىنەن ءىرىپ، ءتۇبى قۇلدىرايتىنىن اتاپ ءوتتى.
"ادىرنا" ۇلتتىق پورتالى
