وزدەرىڭىزگە بەلگىلى، ماۋسىم ايىندا كونستيتۋتسيالىق رەفورمالار بويىنشا رەفەرەندۋم وتكەن ەدى. وندا بىزدىڭ پرەزيدەنتىمىز قاسىم-جومارت كەمەلۇلى توقاەۆتىڭ «ادىلەتتى قازاقستان» قۇرۋ سياقتى كونتسەپتسيالارى ويعا الىندى. كەزەكتەن تىس پرەزيدەنت سايلاۋىن وتكىزۋ ماسەلەسى دە ءبىر جاعىنان دۇرىس شەشىم دەپ ويلايمىن. پرەزيدەنتىمىز قابىلداعان باعىت-باعدارلاردى ىسكە اسىرۋ ءۇشىن جاڭا كوزقاراس، جاڭا باعىت كەرەك. وعان سەنىمدى ماندات كەرەك. ۋاقىتىنان بۇرىن وسىنداي قادامعا بارىپ وتىرعانىنىڭ ءوزى – پرەزيدەنتتىڭ «ادىلەتتى قازاقستاندى» قۇرامىن دەگەن شىن نيەتىنەن تۋىپ وتىر.
حالىقتىق كواليتسيا بولىپ بىرىگىپ، ولار ءبىر اۋىزدان پرەزيدەنت قاسىم-جومارت توقاەۆتىڭ كانديداتۋراسىن ۇسىندى. سونىڭ ىشىندە ۇلتتىق عىلىم اكادەمياسى دا قاسىم-جومارت كەمەلۇلىنىڭ كانديتاتۋراسىن ۇسىنعانىن جاقسى بىلەسىزدەر. جالپى، «ادىلەتتى قازاقستان» قاشان ورنايدى، قاي كەزدە ورنايدى؟» دەگەن زاڭدى سۇراق تۋىنداپ جاتادى. «ادىلەتتى قازاقستان» – زاڭدار ۇستەم قۇرعاندا ورنايدى. سول سەبەپتەن دە، كونستيتۋتسيالىق رەفورمالار جاساپ، وزگەرىستەردى ەنگىزىپ الدىق. ەلگە جەتكىزەتىن، ەلمەن كەرى بايلانىس ورناتاتىن، «حالىق ۇنىنە قۇلاق اساتىن ۇكىمەتتى» قۇرىپ جاتىرمىز. ەندى بۇرىنعىداي قۇر ماقتاۋ، جالعان ەسەپتەردەن ارىلىپ، ناقتى كورسەتكىشتەرگە، ناقتى شەشىمدەرگە جۇمىس ىستەيتىن بولامىز. باردى بار، جوقتى جوق دەپ ايتاتىن كەز كەلدى. حالىقتىق كواليتسيا فورۋمىندا دا پرەزيدەنت قوعامعا قاجەتتى قاعيدالاردى اتاپ ءوتتى.
مەملەكەت باسشىسىنىڭ «ءبىزدىڭ تاۋەلسىزدىگىمىز بارىنەن قىمبات» دەگەن ءسوزى – تاۋەلسىزدىگىمىزدى كوزىمىزدىڭ قاراشىعىنداي ساقتاۋ دەگەن ءسوز. بىزگە مەملەكەت نە بەرەدى دەپ ەمەس، ءبىز مەملەكەتكە نە بەرەمىز، قانداي كومەگىمىز بولادى دەگەن باعىتتا ارقايسىسىمىز قولعا العان ءجون. ول ءۇشىن ءبىلىمدى، سانالى جاس ۇرپاق جەتىلۋى ءتيىس. ەكونوميكامىز قالىپتاسىپ، الەۋمەتتىك احۋالىمىز ارتاتىن بولسا، مەملەكەت ىشىنەن دە نەبىر دارىندى جاستار ءوسىپ شىعادى. ولار بىلىمگە دە، عىلىمعا دا ءوز ۇلەسىن قوساتىن بولادى. پرەزيدەنت ۇلتتىق عىلىم اكادەمياسىنا بارعانىندا: «اكادەميانىڭ مارتەبەسىن كوتەرۋ كەرەك دەپ سانايمىن. بۇل قۇرىلىم عىلىمي وي-تۇجىرىم ورتالىعىنا اينالۋعا ءتيىس. سونداي-اق ساراپتاما جاسايتىن بەدەلدى مەكەمە بولۋى كەرەك. قارا شاڭىراقتىڭ ءرولىن ارتتىرۋ ماڭىزدى» دەپ ايتقانى ەسىمىزدە. ەكونوميكامىز دامۋى ءۇشىن دە ەڭ الدىمەن عىلىم-بىلىمگە كوبىرەك كوڭىل ءبولۋ كەرەك ەكەنىن ايتىپ وتىر.
ەندەشە، الداعى سايلاۋدا «ادىلەتتى قازاقستان» ءۇشىن داۋىس بەرۋ ماڭىزدى دەپ سانايمىن. 7 جىل ىشىندە پرەزيدەنت باستامالارى جۇزەگە اسىپ، ناتيجەسىن كورەتىن بولامىز.
كارىمبەك قۇرماناليەۆ،
قر ۇلتتىق عىلىم اكادەمياسىنىڭ اكادەميگى
