حالىق اندەرىن كاسىبي ورىنداۋشى ونەر قايراتكەرى، قر حالىق ءارتىسى، پرفوەسسور، قاجىبەك بەكبوسىنوۆ ومىردەن ءوتتى. بۇل تۋرالى ءانشىنىڭ ۇلى راۋان قاجىبەكۇلى حابارلادى، دەپ جازدى "ادىرنا" ۇلتتىق پورتالى.
بەكبوسىن قاجىبەك قۇدايبەرگەنۇلى 1946 جىلدىڭ 19-مامىر ايىندا تالدىقورعان وبلىسى قاپال اۋدانى، قوڭىر اۋىلى، ۇزىنبۇلاق بولىمشەسىندە دۇنيەگە كەلگەن. ع. ورمانوۆ اتىنداعى 11 جىلدىق مەكتەپتى ءبىتىرىپ، الماتىداعى ەسترادا جانە تسيرك ونەرى ستۋدياسىندا قازسسر حالىق ءارتىسى عاريفوللا قۇرمانعاليەۆتىڭ حالىق ءانى كلاسىنا وقۋعا ءتۇستى. وقۋدى بىتىرگەننەن كەيىن مەملەكەتتىك «قازاقكونتسەرت» بىرلەستىگىندە ءانشى-دومبىراشى بولىپ قىزمەت اتقارعان. مۇحيت، اقان سەرى، ءبىرجان، اسەت، جاياۋ مۇسا، كەنەن ازىرباەۆ، ەستاي اندەرىن ناقىشىنا كەلتىرىپ ورىندادى. حالقىنا ونەرىن پاش ەتىپ، تىڭدارماندارىنىڭ سۇيىكتىسىنە اينالدى. قازاقستان رەسپۋبليكاسىنىڭ حالىق ءارتىسى اتاعىن يەلەندى.
ءومىرىنىڭ سوڭعى جىلدارىندا شاكىرت تاربيەلەپ، ەلىمىزدىڭ بىرقاتار وقۋ ورىندارىندا ۇستازدىق قىزمەت اتقاردى. قاجىبەك قۇدايبەرگەنۇلى ورىنداۋشىلىق شەبەرلىگىمەن قازاق انشىلىك ونەرىن دامىتۋعا ەلەۋلى ۇلەس قوسقان تۇلعا رەتىندە حالىق جادىندا ساقتالادى.
"ادىرنا" ۇلتتىق پورتالىنىڭ ۇجىمى دۇنيەدەن وتكەن ونەر قايراتكەرىنىڭ بالالارىنا، تۋعان-تۋىسقاندارى مەن ارىپتەستەرىنە، شاكىرتتەرىنە قايعىرىپ كوڭىل ايتادى.
"ادىرنا" ۇلتتىق پورتالى
