«قازاقستان» ورتالىق كونتسەرت زالىندا «مەرەيلى وتباسى» ۇلتتىق كونكۋرسىنىڭ جەڭىمپازدارىن سالتاناتتى تۇردە ماراپاتتاۋ ءراسىمى ءوتتى.
جىل سايىن وتكىزۋ يگى داستۇرگە اينالعان ۇلگىلى وتباسىلار بايقاۋى – ەلىمىزدە جانۇيا قۇندىلىقتارىنىڭ ءرولىن ارتتىرىپ، وتباسى مەن نەكەنىڭ وڭ ءيميدجىن دارىپتەيتىن اۋقىمدى دا ماڭىزدى وقيعالاردىڭ ءبىرى. 2014 جىلدان بەرى بايقاۋعا 20 مىڭنان استام وتباسى قاتىسقان.
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا سالتاناتتى شارانىڭ اشىلۋ بارىسىندا بايقاۋ جەڭىمپازدارىنا مەملەكەت باسشىسىنىڭ قۇتتىقتاۋىن وقىپ بەردى.
«جىل سايىن وتكىزىلەتىن بايقاۋ شاڭىراعى شاتتىققا بولەنىپ، بەرەكەلى بىرلىك پەن تاتۋلىققا ۇيىعان ونەگەلى وتباسىلاردى كۇللى ەلگە تانىتتى. مۇنداي ۇلگىلى اۋلەتتەر ەلىمىزدە وتە كوپ.
حالقىمىز قاي زاماندا دا وتباسى داستۇرلەرىن بەرىك ۇستانىپ، قادىرلەي بىلگەن. ۇلكەنگە قۇرمەت، كىشىگە ىزەت كورسەتۋ ء–بىزدىڭ قانىمىزعا سىڭگەن قاسيەت.
ءاربىر ازاماتتىڭ ادامگەرشىلىك بولمىسىنىڭ قالىپاتسۋىنا وتباسىنداعى احۋال ايرىقشا ىقپال ەتەدى. اكە-شەشەسىنىڭ اتا-اجەنىڭ تاربيەسىن كورىپ، ۇلكەندەردەن تاعلىم الىپ وسكەن بالا ەسەيگەندە وتانشىل، ءبىلىمپاز، ەڭبەكقور ازاماتقا اينالادى» - دەلىنگەن قۇتتىقتاۋدا.
بيىل بايقاۋعا 2542 وتباسى قاتىستى. ولاردىڭ جارتىسىنان استامى (63,4%) اۋىل تۇرعىندارى. سونداي-اق، 1166 تابىستى كوپبالالى جانە ەرلى-زايىپتىنىڭ ەكەۋى دە 29 جاسقا تولماعان 501 جاس وتباسى قاتىستى.
ءتۇرلى كاسىپ پەن ەڭبەك اۋلەتتەرىنىڭ، سپورت جانە شىعارماشىلىق جانۇيا وكىلدەرىنەن قۇرالعان 20 وتباسى – ءوڭىر جەڭىمپازدارى اتاندى. «مەرەيلى وتباسى» ۇلتتىق كونكۋرسى – ۇلكەنگە قۇرمەت، كىشىگە ىزەت رۋحاني-ادامگەرشىلىك قاعيداسىنا نەگىزدەلگەن جانە ونى ۇرپاقتان-ۇرپاققا جەتكىزۋدى كوزدەيتىن وتباسى قۇندىلىعىن دارىپتەپ كەلەدى.
بارلىق وتباسىنىڭ ءاربىر مۇشەسى – اۋىلداستارىنىڭ، قالا تۇرعىندارىنىڭ، ارىپتەستەرىنىڭ، كورشى-قولاڭنىڭ قۇرمەتىنە بولەنگەن، وتانىنا ادال قىزمەت ەتىپ جۇرگەن ەڭبەك ادامى، اۋىلدىڭ، قالانىڭ قاراپايىم ەڭبەككەرلەرى.
ماراپاتتاۋ راسىمىنە مەملەكەتتىك ورگانداردىڭ وكىلدەرى، پارلامەنت سەناتى مەن ءماجىلىسىنىڭ دەپۋتاتتارى، قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى قاتىستى.
لاۋرەات وتباسىلار ديپلومدارمەن جانە ەستەلىك سىيلىقتارمەن ماراپاتتالدى.
ماراپاتتاۋ ءراسىمى قازاق ەسترادا جۇلدىزدارىنىڭ قاتىسۋىمەن وتكەن مەرەكەلىك كونتسەرتپەن جالعاستى.
