«Qazaqstan» ortalyq konert zalynda «Mereıli otbasy» Ulttyq konkýrsynyń jeńimpazdaryn saltanatty túrde marapattaý rásimi ótti.
Jyl saıyn ótkizý ıgi dástúrge aınalǵan úlgili otbasylar baıqaýy – elimizde januıa qundylyqtarynyń rólin arttyryp, otbasy men nekeniń oń ımıdjin dáripteıtin aýqymdy da mańyzdy oqıǵalardyń biri. 2014 jyldan beri baıqaýǵa 20 myńnan astam otbasy qatysqan.
Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraǵasy Aıda Balaeva saltanatty sharanyń ashylý barysynda baıqaý jeńimpazdaryna Memleket basshysynyń quttyqtaýyn oqyp berdi.
«Jyl saıyn ótkiziletin baıqaý shańyraǵy shattyqqa bólenip, berekeli birlik pen tatýlyqqa uıyǵan ónegeli otbasylardy kúlli elge tanytty. Mundaı úlgili áýletter elimizde óte kóp.
Halqymyz qaı zamanda da otbasy dástúrlerin berik ustanyp, qadirleı bilgen. Úlkenge qurmet, kishige izet kórsetý –bizdiń qanymyzǵa sińgen qasıet.
Árbir azamattyń adamgershilik bolmysynyń qalypatsýyna otbasyndaǵy ahýal aıryqsha yqpal etedi. Áke-sheshesiniń ata-ájeniń tárbıesin kórip, úlkenderden taǵlym alyp ósken bala eseıgende otanshyl, bilimpaz, eńbekqor azamatqa aınalady» - delingen quttyqtaýda.
Bıyl baıqaýǵa 2542 otbasy qatysty. Olardyń jartysynan astamy (63,4%) aýyl turǵyndary. Sondaı-aq, 1166 tabysty kópbalaly jáne erli-zaıyptynyń ekeýi de 29 jasqa tolmaǵan 501 jas otbasy qatysty.
Túrli kásip pen eńbek áýletteriniń, sport jáne shyǵarmashylyq januıa ókilderinen quralǵan 20 otbasy – óńir jeńimpazdary atandy. «Mereıli otbasy» ulttyq konkýrsy – úlkenge qurmet, kishige izet rýhanı-adamgershilik qaǵıdasyna negizdelgen jáne ony urpaqtan-urpaqqa jetkizýdi kózdeıtin otbasy qundylyǵyn dáriptep keledi.
Barlyq otbasynyń árbir múshesi – aýyldastarynyń, qala turǵyndarynyń, áriptesteriniń, kórshi-qolańnyń qurmetine bólengen, Otanyna adal qyzmet etip júrgen eńbek adamy, aýyldyń, qalanyń qarapaıym eńbekkerleri.
Marapattaý rásimine memlekettik organdardyń ókilderi, Parlament Senaty men Májilisiniń depýtattary, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń músheleri qatysty.
Laýreat otbasylar dıplomdarmen jáne estelik syılyqtarmen marapattaldy.
Marapattaý rásimi qazaq estrada juldyzdarynyń qatysýymen ótken merekelik konertpen jalǵasty.
