قوستاناي وبلىسىنىڭ اۋليەكول اۋدانىندا بولعان الاپات ورتتەن جاپا شەگىپ، باسپاناسىز قالعان تۇرعىندارعا جاڭا ۇيلەردىڭ كىلتى تابىستالدى. بۇل تۋرالى kostanaytany.kz حابارلادى، دەپ جازادى "ادىرنا" ۇلتتىق پورتالى.
91 وتباسى قونىس تويىن اتاپ ءوتىپ، ورمان ءورتى باسپانالارىن تىپ-تيپىل ەتىپ، توتەننەن بەينەتكە تاپ بولعان تۇرعىندار سۋداي جاڭا ۇيگە كىردى. قۋانىشتارىندا شەك جوق. قامقورلىق جاساعان وتانداستارىنا، ءبيلى ككە العىس جاۋدىرىپ وتىر. ماسەلەن، بەيسەنباي راحمەتوۆ سوناۋ كۇنگى سويقاندى كورگەن تۇستەي عانا ەسكە الادى.
-اجداھا ءورت اۋىلعا اۋىز سالعاندا ۇساق مالدارىمدى امان الىپ قالۋ ءۇشىن ءورت ورتاسىندا ارپالىستىم. وتباسىمدى قاۋىپسىز ايماققا شىعارىپ سالعان ەدىم. ءورت سۇمدىق بولدى. بەت قاراتپايتىن جالىن مەن قويۋ ءتۇتىن ورتاسىندا قالىپ قويدىم. مەنى ىزدەپ كەلگەن بالالارىم ءتىرى ەكەنىمدى كورىپ، جىلاپ جىبەردى،-دەيدى ول.
زەينەتكەر باسقا جاپا شەگۋشىلەر سەكىلدى جاردەماقى الىپ، ۇيىمەن بىرگە كۇلگە اينالعان قۇجاتتارىن دا قالىپقا كەتىرىپ العان. بۇگىن ءبارى تاعاتسىز كۇتكەن باسپانالارىنىڭ كىلتىن يەلەندى.
رەسمي شارانى وبلىس اكىمى ارحيمەد مۇحامبەتوۆ جۇرگىزىپ، رەكوردتىق از ۋاقىتتا "بىرلىك" اتتى شاعىن اۋداندى سالىپ شىققان قۇرىلىسشى كومپانيالارعا العىسىن ايتتى. كىلت تابىستاۋ راسىمىنەن سوڭ بيلىك وكىلدەرى ءۇيدى-ۇيگە كىرىپ، قۇرىلىس ساپاسىمەن تانىستى.
ايتا كەتەيىك، 12 سوتىق جەرگە سالىنعان ءار پاتەردىڭ اۋقىمى 100 شارشى مەتر، ءتورت بولمەلى. ارقايسىسىنا تابيعي گاز، سۋ ەنگىزىلگەن. سونداي-اق، ينتەرنەت تارتىلعان، ونى تۇرعىندار ءبىر جىل تەگىن پايدالانباق. بۇعان دەيىن دە جازعانىمىزداي، اۋليەكول كەنتىنىڭ تۇبىندەگى 91 تۇرعىن ءۇيدىڭ قۇرىلىسىنا پرەزيدەنت تاپسىرماسىمەن 2,3 ملرد تەڭگە بولىنگەن بولاتىن. قۇرىلىس جۇمىستارىمەن 13 مەردىگەر كومپانيا اينالىستى.
"ادىرنا" ۇلتتىق پورتالى
