Qostanaı oblysynyń Áýlıekól aýdanynda bolǵan alapat órtten japa shegip, baspanasyz qalǵan turǵyndarǵa jańa úılerdiń kilti tabystaldy. Bul týraly kostanaytany.kz habarlady, dep jazady "Adyrna" ulttyq portaly.
91 otbasy qonys toıyn atap ótip, orman órti baspanalaryn typ-tıpyl etip, tótennen beınetke tap bolǵan turǵyndar sýdaı jańa úıge kirdi. Qýanyshtarynda shek joq. Qamqorlyq jasaǵan otandastaryna, bıli kke alǵys jaýdyryp otyr. Máselen, Beısenbaı Rahmetov sonaý kúngi soıqandy kórgen tústeı ǵana eske alady.
-Ajdaha órt aýylǵa aýyz salǵanda usaq maldarymdy aman alyp qalý úshin órt ortasynda arpalystym. Otbasymdy qaýipsiz aımaqqa shyǵaryp salǵan edim. Órt sumdyq boldy. Bet qaratpaıtyn jalyn men qoıý tútin ortasynda qalyp qoıdym. Meni izdep kelgen balalarym tiri ekenimdi kórip, jylap jiberdi,-deıdi ol.
Zeınetker basqa japa shegýshiler sekildi járdemaqy alyp, úıimen birge kúlge aınalǵan qujattaryn da qalypqa ketirip alǵan. Búgin bári taǵatsyz kútken baspanalarynyń kiltin ıelendi.
Resmı sharany oblys ákimi Arhımed Muhambetov júrgizip, rekordtyq az ýaqytta "Birlik" atty shaǵyn aýdandy salyp shyqqan qurylysshy kompanııalarǵa alǵysyn aıtty. Kilt tabystaý rásiminen soń bılik ókilderi úıdi-úıge kirip, qurylys sapasymen tanysty.
Aıta keteıik, 12 sotyq jerge salynǵan ár páterdiń aýqymy 100 sharshy metr, tórt bólmeli. Árqaısysyna tabıǵı gaz, sý engizilgen. Sondaı-aq, ınternet tartylǵan, ony turǵyndar bir jyl tegin paıdalanbaq. Buǵan deıin de jazǵanymyzdaı, Áýlıekól kentiniń túbindegi 91 turǵyn úıdiń qurylysyna Prezıdent tapsyrmasymen 2,3 mlrd teńge bólingen bolatyn. Qurylys jumystarymen 13 merdiger kompanııa aınalysty.
"Adyrna" ulttyq portaly
