ريددەردە جىلۋمەن قامسىزداندىرۋ قىزمەتى كەشكە دەيىن قالىپقا كەلتىرىلەدى. مازۋتتىڭ ساپاسىنا بايلانىستى شتاتتان تىس جاعداي ورىن الدى. تەحنيكالىق سەبەپتەرگە بايلانىستى جەو جۇمىسى توقتاتىلدى. بىراق تۇرعىندارعا الاڭداۋعا نەگىز جوق، جىلۋمەن قامسىزداندىرۋ جۇمىسى كەشكە قالىپقا كەلتىرىلەدى.
جەو باسشىلىعى سۋ ارالاسقان مازۋتتىڭ ساپاسىن باقىلاماي، سالعىرتتىق تانىتقان.
قازىر جىلۋ بەرۋ ستانتسياسىنا "قازتسينك" جشس-دان 60 توننا مازۋت جانە جەو ءوب-دان 70 توننا مازۋت جىبەرىلدى. 25 قازاندا تۇنگى بىرلەردە تاعى التى تسيستەرنا كەلىپ جەتەدى. مۇنىڭ ءبارى ستانتسيانى 100 كۇندىك ۇزدىكسىز جۇمىس ىستەۋى ءۇشىن وتىنمەن قامتاماسىز ەتۋگە مۇمكىندىك بەرەدى، ياعني قالانى جىلۋمەن جابدىقتاۋ ەڭ قىسقا مەرزىمدە قالپىنا كەلتىرىلەدى.شقو اكىمدىگىنىڭ ءباسپاسوز قىزمەتى
ءوڭىر باسشىسى دانيال احمەتوۆ اتاپ وتكەندەي، وسى ۋاقىتتا جەو ءوب-دان ريددەردەگى جەو-عا 20 توننا مازۋت تيەگەن العاشقى كولىك اتتانىپ كەتتى، ءبىر ساعات بارىسىندا جول پوليتسياسىنىڭ الىپ جۇرۋىمەن تاعى 50 توننا جونەلتىلەدى، سونداي-اق "قازتسينك" جشس-دا مازۋت جەتكىزەدى.
ستانتسيانىڭ ەكىنشى قازاندىعى قاتتى وتىنمەن جۇمىس ىستەيدى، ءبىرىنشى جانە ءۇشىنشىسىن ىسكە قوسۋ جۇمىستارى جۇرگىزىلىپ جاتىر، ال ساعات 22:00-گە دەيىن ريددەر جەو تەمپەراتۋرالىق رەجيمگە سايكەس تۇرعىن ۇيلەر مەن الەۋمەتتىك نىسانداردى جىلۋمەن قامتاماسىز ەتەدى.
ءوڭىر پروكۋراتۋراسى "ريددەر جەو" اق باسشىلىعى تاراپىنان جىبەرىلگەن نەمقۇرايلىلىق فاكتىسى بويىنشا تەرگەۋ امالدارىن قولعا الدى. جەدەل شتاب قۇرىلدى، جاعداي ءوڭىر باسشىسىنىڭ جەكە باقىلاۋىنا الىندى. قازىر قالادا وبلىس اكىمىنىڭ ورىنباسارى ءجۇر. حالىق اراسىندا دۇربەلەڭنىڭ ورىن الۋىنا نەگىز جوق. ساعات 22:00-گە دەيىن جىلۋمەن جابدىقتاۋ جۇيەسى نورماتيۆتىك رەجيمگە وتەدى.
"ادىرنا" ۇلتتىق پورتالى
