قازاقستاندىق 17 جاستاعى ارۋجان ساعاندىقوۆا تۇركيانىڭ انتاليا قالاسىندا ITF World Tennis Tour W15 ءتۋرنيرىنىڭ چەمپيونى اتاندى. بۇل تۋرالى قازاقستان تەننيس فەدەراتسياسى حابارلادى، دەپ جازادى "ادىرنا" ۇلتتىق پورتالى.
Team Kazakhstan اكادەمياسىنىڭ تۇلەگى ارۋجان قىتايلىق يۋ-يۋن ليمەن بىرگە جۇپتىق سىندا ۇزدىك شىقتى. قازاقستاندىق-قىتايلىق جۇپ فينالدا رەسەيلىكتەر، اپالى-ءسىڭلىلى اناستاسيا مەن رادا زولوتارەۆالاردى تارتىستى باسەكەدە تىزە بۇكتىردى – 7:5, 3:6, 10:4.
ارۋجان جەكەلەي سىندا دا تىم-ءتاۋىر ونەر كورسەتىپ، شيرەك فينالعا دەيىن جەتتى.
«قۋانىشىمدا شەك جوق، ويتكەنى ەرەسەكتەر اراسىنداعى ITF جارىسىندا العاشقى تيتۋلىما قول جەتكىزدىم. سوندىقتان، بۇگىن مەن ءۇشىن ەرەكشە كۇن بولدى. ماعان سەنىم ارتىپ، قولداعان بولات وتەمۇراتوۆ باستاعان قازاقستان تەننيس فەدەراتسياسىنا، باپكەرىم رۋسلان مۋحامەدزيانوۆقا العىسىمدى ايتامىن»، - دەدى ماراپاتتاۋدان سوڭ ارۋجان ساعاندىقوۆا.
"ادىرنا" ۇلتتىق پورتالى
