مەملەكەت باسشىسى قاسىم-جومارت كەمەلۇلىنىڭ تاپسىرماسى نەگىزىندە الماتى قالاسىنىڭ جەتىسۋ اۋدانىندا 160 ورىنعا ارنالعان سۋ جاڭا بالاباقشانىڭ ىرگەتاسى قالانىپ باستالدى، دەپ حابارلايدى «ادىرنا» ءتىلشىسى.
ەسەرىڭىزدە بولسا، پرەزيدەنت قاسىم-جومارت توقاەۆ قازاقستان حالقىنا جولداۋىندا 2025 جىلعا دەيىن التى جاسقا تولماعان بالالاردى مەكتەپكە دەيىنگى بىلىممەن 100% قامتۋدى تاپسىردى.
وسى پارمەننىڭ اياسىندا الماتى ماڭىندا مەكتەپكە دەيىنگى ۇيىمدار قۇرىلىسى قارقىن الۋدا. بۇل تۋرالى شاھار باسشىسى ەربولات دوسەاۆ جەتىسۋ اۋدانىنىڭ تۇرعىندارىمەن وتكىزگەن كەزدەسۋىندە ايتقان ەدى.
بۇگىنگى تاڭدا جەتىسۋ اۋدانىنداعى 2 بالاباقشاعا ورىن تاپشىلىعىن قىسقارتۋ ماقساتىندا كۇردەلى جوندەۋ جۇمىستارى ءجۇرىپ جاتىر.
«مەكتەپكە دەيىنگى ۇيىمدارداعى ورىن تاپشىلىعىن قىسقارتۋ ماقساتىندا 440 ورىندىق 2 بالاباقشانىڭ قۇرىلىس-مونتاجداۋ جانە جوبالاۋ جۇمىستارى جۇرگىزىلۋدە. «اينابۇلاق-4» شاعىناۋدانىندا 160 ورىندىق بالاباقشانىڭ قۇرىلىسى باستالدى. قۇرىلىسى كەلەسى جىلدىڭ ماۋسىم ايىندا اياقتالادى. وسى جىلدىڭ ماۋسىم ايىندا جەكە مەنشىكتە بولعان ەكى قاباتتى اكىمشىلىك عيمارات ساتىپ الىندى. قازىرگى ۋاقىتتا 280 ورىندىق بالاباقشانى كۇردەلى جوندەۋ ءۇشىن جوبالاۋ-سمەتالىق قۇجاتتاما ازىرلەنۋدە. جوبالاۋ جەلتوقساندا اياقتالىپ، قۇرىلىسى 2023 جىلدىڭ I توقسانىندا باستالادى. بۇل مەكتەپكە دەيىنگى مەكەمەگە راتۋشنىي-قازىباەۆ-سەرىكوۆ-رىسقۇلوۆ كوشەلەرىندە تۇراتىن بالالار بارا الادى»، – دەدى قالا اكىمى ەربولات دوساەۆ.
