قر مەملەكەتتىك كەڭەسشىسى ەرلان قارين قر پرەزيدەنتىنىڭ كەزەكتەن تىس سايلاۋىندا داۋىس بەردى، دەپ حابارلايدى “ادىرنا” ۇلتتىق پورتالى.
ول استاناداعى قازاقستان رەسپۋبليكاسى ۇلتتىق كىتاپحاناسىنىڭ عيماراتىندا داۋىس بەردى.
«ءار سايلاۋدىڭ ماڭىزى زور. ويتكەنى ءاربىر سايلاۋدىڭ ناتيجەسى ەلىمىزدىڭ بولاشاق دامۋىنا، ءبىزدىڭ بولاشاعىمىزعا، ءاربىر ازاماتتىڭ بولاشاعىنا اسەر ەتەدى. بۇل سايلاۋدىڭ ەلىمىزدىڭ دامۋ بولاشاعىن ايقىنداۋ ءۇشىن ماڭىزى زور دەپ ويلايمىن. بۇل سايلاۋ جاڭا مەملەكەتتىك قۇرىلىمنىڭ نەگىزىن قالادى. سوندىقتان ازاماتتاردى بۇگىن سايلاۋعا كەلىپ، كونستيتۋتسيالىق قۇقىعىن پايدالانۋعا شاقىرامىن. ەلىمىزدىڭ ودان ءارى دامىپ، شەشىمدى بىرگە قابىلدايتىنىن قالاساق، مەنىڭ ويىمشا، سايلاۋ دا ازاماتتاردىڭ ىنتىماق پەن ازاماتتىق بەلسەندىلىك تانىتاتىن تاماشا مۇمكىندىگى سياقتى. قوعامدا جاڭا وڭ وزگەرىستەر كۇتىلەتىنىن بىلەمىن. بۇل سايلاۋ جاڭا وزگەرىستەرگە سەرپىن بەرەدى دەپ ويلايمىن»، - دەدى ەرلان قارين.
