بۇگىن ەلوردادا كاسىپكەرلەرگە پرەزيدەنتتىڭ «التىن ساپا» سىيلىعى تابىستالدى. جەڭىمپازداردى ماراپاتتاۋ راسىمىنە بيزنەس وكىلدەرى ەلىمىزدىڭ تۇكپىر-تۇكپىرىنەن جينالدى. مەملەكەت باسشىسى قاسىم-جومارت توقاەۆ لاۋرەاتتارعا ەل ەكونوميكاسىنا قوسقان ۇلەسى ءۇشىن ريزاشىلىعىن ءبىلدىرىپ، سىيلىقتىڭ كوپتەگەن جىلبويى يگى داستۇرگە اينالعانىن اتاپ ءوتتى.
«بارشاڭىزدى «التىن ساپا»، «پارىز»، «قازاقستاننىڭ ۇزدىك تاۋارى» بايقاۋلارىنىڭ ءوز مارەسىنە جەتۋىمەن قۇتتىقتايمىن! ءبىز جىل سايىن وسى سالتاناتتى جيىندا ەل دامۋىنا ەلەۋلى ۇلەس قوسقان كاسىپكەرلەرگە قۇرمەت كورسەتەمىز. بۇل – تالاي جىلدان بەرى جاقسى داستۇرگە اينالعان ماڭىزدى ءىس-شارا. قازىر قازاقستاندا بيزنەس سالاسى قارقىندى دامىپ كەلەدى. بۇعان مەملەكەت تاراپىنان بارلىق جاعداي جاسالىپ جاتىر. شاعىن جانە ورتا بيزنەستىڭ ىشكى جالپى ونىمدەگى ۇلەسى 36 پايىزدان استى. بۇل – شىن مانىندە، جوعارى كورسەتكىش. وسى سالادا جۇمىس ىستەيتىن ادامداردىڭ سانى 4,3 ميلليونعا جەتتى. ياعني ەڭبەككە جارامدى ازاماتتاردىڭ 45 پايىزى دەگەن ءسوز»، – دەدى مەملەكەت باسشىسى قاسىم-جومارت توقاەۆ.
«ۇزدىك يندۋستريالىق جوبا» ارنايى سىيلىعىن قوستاناي ءوبلىسىنىڭسۇت جانە اشىتىلعان ءسۇت ونىمدەرىن وندىرەتىن «دەپ» جشس الدى. ال «ۇزدىك يننوۆاتسيالىق جوبا سىيلىعىن ماڭعىستاۋ وبلىسىنىڭ «CleanFieldKazakhstan»الدى. جەڭىمپاز جشس بۇرعىلاۋ، مۇناي قوقىرى، لاستانعان توپىراق جانە باسقا دا مۇنايمەن لاستانعان جەرلەردى مۇنايدان تازالايدى.
«پرەزيدەنت قاسىم-جومارت كەمەلۇلى جانە «اتامەكەن» ۇكپ باسشىلىعىنا كاسىپورنىمىزعا جوعارى باعا بەرگەنىنە ريزاشىلىعىمىزدى بىلدىرەمىز. 2021 جىلى وندىرىستىك كەشەنىمىزدى كەلىسىمشارتتىق اۋماققا ورنالاستىردىق. قازاقستاندا العاشقى بولىپ ارالاس تەحنولوگيامەن مۇناي-گاز قالدىقتارى سىڭگەن توپىراقتى وڭدەۋ بويىنشا ەۋروپالىق جابدىق پەن ادىستەمە پايدالاندىق. ءوز جۇمىسىمىزدى بۇكىل رەسپۋبليكا اۋماعىندا تاراتۋدى جوسپارلاپ وتىرمىز. سونداي-اق قازاقستاندا تىركەلگەن مۇناي سەرۆيستىك ۇيىم رەتىندە شەت ەلدەرگە ەكسپورتتاۋدى دا كوزدەپ وتىرمىز»، – دەدى جەڭىمپاز، «CleanFieldKazakhstan» جشس ديرەكتورى بەكتاس ءابدىماناپوۆ.
ماراپاتتاۋ راسىمىندە «CleanFieldKazakhstan» جشس جانە باسقا كومپانيالاردىڭ ونىمدەرى فويەدە ينستاللياتسيا رەتىندە ۇسىنىلدى. بۇل ونىمدەردى «اتامەكەن» ۇكپ تورالقا توراعاسى رايىمبەك باتالوۆ پەن «اتامەكەن» ۇكپ تورالقاسى جانىنداعى ىسكەر ايەلدەر كەڭەسىنىڭ ءتورايىمى ءلاززات رامازانوۆا مەملەكەت باسشىسىنا تانىستىردى.
اتاپ ايتقاندا، «ءبىر اۋىل – ءبىر ءونىم» جوباسى تانىستىرىلدى. بۇل جوبانى ۇلتتىق پالاتا جەرگىلىكتى ءونىمنىڭ ساپاسىن ارتتىرۋ، جەرگىلىكتى برەندتەر قۇرۋ، ماركەتينگ جانە نارىقتاعى ءونىمنىڭ قۇندىلىعىن ارتتىرۋ ماقساتىندا ىسكە اسىرادى.
«بيىل ءبىز جوبا اۋقىمى مەن گراداتسياسىن كەڭەيتتىك. سوندىقتان بايقاۋعا شاعىن جانە ورتا بيزنەس تە قاتىستى. ولاردىڭ ونىمدەرى وڭىردە «ءبىر اۋىل – ءبىر جوبا» شەڭبەرىنە ستەندتەردە تانىستىرىلدى. بۇل يدەيا بيىل سىناقتان ءوتتى، ال كەلەسى جىلى شاعىن جانە ميكرو بيزنەسكە ارنالعان جەكە «التىن ساپا» سىيلىعى بولادى. ءبىز لوكاليزاتسيا مەن قازاقستاندىق قامتۋعا دا نازار اۋداردىق. ەكىنشى ستەندتە جەڭىل ونەركاسىپ ونىمدەرى ۇسىنىلعان. بۇگىن مەملەكەت باسشىسى ستەندتى قاراپ، بۇگىنگى كۇننىڭ ايازىندا شاراعا وتاندىق اياق كيىم كيىپ كەلگەنىن ايتتى. بۇل دا ۇلكەن كورسەتكىش»،– دەدى «اتامەكەن» ۇلتتىق كاسىپكەرلەر پالاتاسىنىڭ باسشىسى رايىمبەك باتالوۆ.
قر پرەزيدەنتىنىڭ «التىن ساپا» سىيلىعى جىل سايىن وتەدى. بايقاۋدا «وندىرىستىك ماقساتتاعى ۇزدىك كاسىپورىن»، «حالىققا ارنالعان تاۋار شىعاراتىن ۇزدىك كاسىپورىن»، «قىزمەت كورسەتەتىن ۇزدىك كاسىپورىن»، «ازىق-تۇلىك جانە/نەمەسە اۋىلشارۋاشىلىق ونىمدەرىن شىعاراتىن ۇزدىك كاسىپورىن» اتتى 4 نوميناتسيادان بولەك «ۇزدىك يندۋستريالىق جوبا» جانە «ۇزدىك يننوۆاتسيالىق جوبا» ارنايى سىيلىقتارى قاراستىرىلعان.
سىيلىقتىڭ 14 لاۋرەاتى ديپلومدار، بايقاۋ ەمبلەماسىمەن جانە جەڭىمپازداردى كەلەسى كەزەڭ – تمد-نىڭ ءونىم جانە قىزمەت كورسەتۋ ساپاسى سالاسىنداعى بايقاۋىنا قاتىسۋىن ىنتالاندىرۋ ءۇشىن 450 اەك مولشەرىندە اقشالاي سىياقىمەن ماراپاتتالادى.
ەسكە سالساق، بايقاۋدىڭ باستى ماقساتى – وتاندىق ءونىمنىڭ ساپاسىن ارتتىرۋ. ۇيىمنىڭ ءونىم نەمەسە قىزمەت ساپاسى سالاسىندا ەلەۋلى ناتيجەلەرگە قول جەتكىزۋى، ءونىم قاۋىپسىزدىگىن قامتاماسىز ەتۋ، سونداي-اق ۇيىمنىڭ ساپانى باسقارۋدىڭ جوعارى ءتيىمدى ادىستەرىن ەنگىزۋى باستى كريتەري سانالادى. بيىل بايقاۋعا قاتىسۋعا 221 كومپانيا ءوتىنىم بەرگەن.
«ادىرنا» ۇلتتىق پورتالى
