Bügın elordada käsıpkerlerge Prezidenttıŋ «Altyn sapa» syilyǧy tabystaldy. Jeŋımpazdardy marapattau räsımıne biznes ökılderı elımızdıŋ tükpır-tükpırınen jinaldy. Memleket basşysy Qasym-Jomart Toqaev laureattarǧa el ekonomikasyna qosqan ülesı üşın rizaşylyǧyn bıldırıp, syilyqtyŋ köptegen jylboiy igı dästürge ainalǧanyn atap öttı.
«Barşaŋyzdy «Altyn sapa», «Paryz», «Qazaqstannyŋ üzdık tauary» baiqaularynyŋ öz märesıne jetuımen qūttyqtaimyn! Bız jyl saiyn osy saltanatty jiynda el damuyna eleulı üles qosqan käsıpkerlerge qūrmet körsetemız. Būl – talai jyldan berı jaqsy dästürge ainalǧan maŋyzdy ıs-şara. Qazır Qazaqstanda biznes salasy qarqyndy damyp keledı. Būǧan memleket tarapynan barlyq jaǧdai jasalyp jatyr. Şaǧyn jäne orta biznestıŋ ışkı jalpy önımdegı ülesı 36 paiyzdan asty. Būl – şyn mänınde, joǧary körsetkış. Osy salada jūmys ısteitın adamdardyŋ sany 4,3 millionǧa jettı. Iаǧni eŋbekke jaramdy azamattardyŋ 45 paiyzy degen söz», – dedı Memleket basşysy Qasym-Jomart Toqaev. «Üzdık industriialyq joba» arnaiy syilyǧyn Qostanai oblysynyŋsüt jäne aşytylǧan süt önımderın öndıretın «DEP» JŞS aldy. Al «Üzdık innovasiialyq joba syilyǧyn Maŋǧystau oblysynyŋ «CleanFieldKazakhstan»aldy. Jeŋımpaz JŞS būrǧylau, mūnai qoqyry, lastanǧan topyraq jäne basqa da mūnaimen lastanǧan jerlerdı mūnaidan tazalaidy. «Prezident Qasym-Jomart Kemelūly jäne «Atameken» ŪKP basşylyǧyna käsıpornymyzǧa joǧary baǧa bergenıne rizaşylyǧymyzdy bıldıremız. 2021 jyly öndırıstık keşenımızdı kelısımşarttyq aumaqqa ornalastyrdyq. Qazaqstanda alǧaşqy bolyp aralas tehnologiiamen mūnai-gaz qaldyqtary sıŋgen topyraqty öŋdeu boiynşa europalyq jabdyq pen ädısteme paidalandyq. Öz jūmysymyzdy bükıl respublika aumaǧynda taratudy josparlap otyrmyz. Sondai-aq Qazaqstanda tırkelgen mūnai servistık ūiym retınde şet elderge eksporttaudy da közdep otyrmyz», – dedı jeŋımpaz, «CleanFieldKazakhstan» JŞS direktory Bektas Äbdımanapov. Marapattau räsımınde «CleanFieldKazakhstan» JŞS jäne basqa kompaniialardyŋ önımderı foiede installiasiia retınde ūsynyldy. Būl önımderdı «Atameken» ŪKP töralqa töraǧasy Raiymbek Batalov pen «Atameken» ŪKP Töralqasy janyndaǧy Isker äielder keŋesınıŋ töraiymy Läzzat Ramazanova Memleket basşysyna tanystyrdy.
Atap aitqanda, «Bır auyl – bır önım» jobasy tanystyryldy. Būl jobany Ūlttyq palata jergılıktı önımnıŋ sapasyn arttyru, jergılıktı brendter qūru, marketing jäne naryqtaǧy önımnıŋ qūndylyǧyn arttyru maqsatynda ıske asyrady.
«Biyl bız joba auqymy men gradasiiasyn keŋeittık. Sondyqtan baiqauǧa şaǧyn jäne orta biznes te qatysty. Olardyŋ önımderı öŋırde «Bır auyl – bır joba» şeŋberıne stendterde tanystyryldy. Būl ideia biyl synaqtan öttı, al kelesı jyly şaǧyn jäne mikro bizneske arnalǧan jeke «Altyn sapa» syilyǧy bolady. Bız lokalizasiia men qazaqstandyq qamtuǧa da nazar audardyq. Ekınşı stendte jeŋıl önerkäsıp önımderı ūsynylǧan. Bügın Memleket basşysy stendtı qarap, bügıngı künnıŋ aiazynda şaraǧa otandyq aiaq kiım kiıp kelgenın aitty. Būl da ülken körsetkış»,– dedı «Atameken» Ūlttyq käsıpkerler palatasynyŋ basşysy Raiymbek Batalov.
QR Prezidentınıŋ «Altyn sapa» syilyǧy jyl saiyn ötedı. Baiqauda «Öndırıstık maqsattaǧy üzdık käsıporyn», «Halyqqa arnalǧan tauar şyǧaratyn üzdık käsıporyn», «Qyzmet körsetetın üzdık käsıporyn», «Azyq-tülık jäne/nemese auylşaruaşylyq önımderın şyǧaratyn üzdık käsıporyn» atty 4 nominasiiadan bölek «Üzdık industriialyq joba» jäne «Üzdık innovasiialyq joba» arnaiy syilyqtary qarastyrylǧan.
Syilyqtyŋ 14 laureaty diplomdar, baiqau emblemasymen jäne jeŋımpazdardy kelesı kezeŋ – TMD-nyŋ Önım jäne qyzmet körsetu sapasy salasyndaǧy baiqauyna qatysuyn yntalandyru üşın 450 AEK mölşerınde aqşalai syiaqymen marapattalady.
Eske salsaq, baiqaudyŋ basty maqsaty – otandyq önımnıŋ sapasyn arttyru. Ūiymnyŋ önım nemese qyzmet sapasy salasynda eleulı nätijelerge qol jetkızuı, önım qauıpsızdıgın qamtamasyz etu, sondai-aq ūiymnyŋ sapany basqarudyŋ joǧary tiımdı ädısterın engızuı basty kriterii sanalady. Biyl baiqauǧa qatysuǧa 221 kompaniia ötınım bergen.
«Adyrna» ūlttyq portaly
Ūqsas jaŋalyqtar
