قازاقستاندا نەسيەسى بار جانە ونى ءبىر جىل بويى تولەمەي جۇرگەندەردىڭ قارىزى كەشىرىلۋى مۇمكىن. بۇل – جەكە تۇلعانىڭ بانكروتتىعى تۋرالى زاڭ جوباسىندا كورسەتىلگەن مۇمكىندىك. قۇجات جاقىندا دەپۋتاتتار تالقىسىنا ۇسىنىلادى دەپ حابارلايدى «ادىرنا» ءتىلشىسى «حابار24»-كە سىلتەمە جاساپ.
تەلەارنانىڭ مالىمەتىنشە، پروبلەمالىق قارىزى بار قازاقستاندىقتاردىڭ 96 پايىزى – كەپىلسىز نەسيە العاندار. دەمەك، ولاردىڭ دەنى بانكروتتىق تۋرالى زاڭنىڭ يگىلىگىن كورە الادى. قارىز جويىلۋى ءۇشىن وتەلمەگەن سوما 5 ملن تەڭگەگە دەيىن بولۋى كەرەك. سونداي-اق سوتتان تىس بانكروتتىق ءراسىمىن تابىسى كۇنكورىس دەڭگەيىنە جەتپەيتىن ازاماتتار پايدالانا الادى.
قارجى ۆيتسە-ءمينيسترى ەرجان ءبىرجانوۆ بورىشكەردىڭ مۇلكى بولماۋى كەرەكتىگىن ەسكەرتتى. كىرىس پەن مۇلىكتىڭ بار-جوقتىعى ەلەكتروندى ۇكىمەت پورتالى ارقىلى ايقىندالادى. مۇلىكتىڭ ەسەبىن جۇرگىزەتىن بارلىق ۋاكىلەتتى مەملەكەتتىك ورگان دەرەكتەر بازاسىن بىرىكتىرەدى. وسىدان كەيىن بانكتەر ەسەپ ايىرىسۋ شوتتارى بويىنشا اقشا قوزعالىسىن جۇزەگە اسىرادى. سوتتان تىس بانكروتتىققا بانك، ميكرو قارجى ۇيىمدارى مەن كوللەكتورلىق اگەنتتىكتەر الدىنداعى قارىزدار بويىنشا قولدانىلۋى مۇمكىن. ءوتىنىش بويىنشا شەشىمدى جارتى جىل كۇتۋگە تۋرا كەلەدى.
«مىسالى، كەلەسى جىلى زاڭناما جۇمىس ىستەدى دەلىك. 2023 جىلى بانكروت بولىپ تابىلاتىن بولسا، كەيىنگى پروتسەدۋراعا 7 جىل وتكەن سوڭ جۇگىنۋگە مۇمكىندىك بار. بانكروتتىقتان كەيىن ءۇش جىل ىشىندە قارجىلىق جاعدايىنا مونيتورينگ جۇرگىزىلەدى. مۇنداي تاجىريبە باسقا ەۋروپا ەلدەرىندە دە بار. سەبەبى ادەيى جاسالعان بانكروتتىق پروتسەدۋراسىن تەكسەرۋ ءۇشىن سونداي ءتاسىل قولدانىلادى»، – دەدى قارجى ۆيتسە-ءمينيسترى ەرجان ءبىرجانوۆ.
