بۇگىن قاراعاندى قالاسىندا 3 جەلتوقسان مۇگەدەكتىگى بار ادامداردىڭ حالىقارالىق كۇنىنە وراي ءوتىپ جاتقان جيىندا اقپارات جانە قوعامدىق دامۋ ءمينيسترى د.قىدىرالى وسىلاي دەدى.
«اتاۋلى كۇننىڭ ماقساتى – ينكليۋزيۆتى قوعامدى دامىتۋ، مۇمكىندىگى شەكتەۋلى جانداردى قوعامعا تەڭ قۇقىلى ازامات رەتىندە ارالاستىرۋ. مەملەكەت باسشىسى قاسىم-جومارت توقاەۆتىڭ ينكليۋزيۆتى، اشىق باسەكەلەستىك ورنىققان جانە بارىنە تەڭ مۇمكىندىك بەرىلەتىن ادىلەتتى قازاقستاندى قۇرۋ باستاماسىنىڭ باستى يدەياسى – Equality, ياعني تەڭدىك دەپ ويلايمىن» - دەدى مينيستر.
د.قىدىرالىنىڭ سوزىنشە، بۇل تۇرعىدا مۇگەدەكتىگى بار ادامداردى قولداۋدا جان-جاقتى جۇمىستار جۇرگىزىلۋدە. ماسەلەن، بيىل پرەزيدەنت "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى.
اقپارات جانە قوعامدىق دامۋ مينيسترلىگى ينكليۋزيا بويىنشا بىرقاتار ناقتى جۇمىستار اتقارىپ جاتىر. ماسەلەن مينيسترلىك جانىنان اقپاراتقا قول جەتكىزۋ ماسەلەلەرى جونىندەگى كوميسسيا قۇرىلعان. ول اقپاراتقا قول جەتكىزۋدە قوعام مۇددەسىن ەسكەرۋ ءۇشىن جۇمىس ىستەيدى. «اشىق ۇكىمەت» پورتالدارىندا ناشار كورەتىندەرگە ارنالعان بولىكتىڭ دىبىستىق ۆاريانتى ىسكە قوسىلدى.
«مۇگەدەكتىگى بار ادامداردى قولداۋعا باعىتتالعان 3 رەسپۋبليكالىق گرانتتىق جوبا جۇزەگە اسىپ جاتسا، جىل سايىن حالىقتىڭ الەۋمەتتىك وسال توپتارىن قولداۋ سالاسىندا ۇكىمەتتىك ەمەس ۇيىمدار سىيلىقاقى يەگەرى اتانادى. بيىل وسى سالاداعى 12 ۇيىم سىيلىقاقىعا يە بولدى. بۇل – ەڭ كوپ ماراپاتتالعان سالا»، - دەدى مينيستر.
