"قۇم ىشىندە ءبۇر جارعان گۇل". ەكىباستۇزدىق كاسىپكەر-انا كۇنىنە بەس ءجۇز ادامدى تەگىن تاماقتاندىرۋدا

6068

ەكىباستۇزداعى الاعاي شاق باستالعالى كۇنىنە بەس ءجۇز ادامدى تەگىن تاماقتاندىرىپ وتىرعان كاسىپكەر، حالقىنىڭ ايالى الاقىندا تەربەتىلگەن ازامات، جۇرەگى مەيىرىمگە تۇنعان ابزال انا شاتتىق ەشمۇراتقىزى جايلى "ادىرنا" ۇلتتىق پورتالى قالام تەربەيدى. كەيىپكەردىڭ ەكىباستۇز حالقىنا كورسەتكەن كومەگى قالىڭ جۇرتتىڭ نازارىن اۋداردى. 

- بالالارىم وسى جەردە تۋعان سوڭ، ەكىباستۇز ماعان سوندىق ىستىق. ءوزىمنىڭ ەلىم دەپ سانايمىن. حالىققا ايتارىم، وكىنىشكە قاراي، كىم وسىنداي قيىن جاعدايعا تاپ بولسا، بىزگە جۇگىنسە بولادى. كەلىڭىزدەر! ەش قىسىلماڭىزدار. تاڭعى، تۇسكى، كەشكى اس بار. جاتىن ورىن بار. ەسىگىمىز ءاردايىم اشىق. بىرلەسىپ، ءبىر-ءبىرىمىزدى ساقتايىق، - دەيدى جۇزىنەن شۋاق شاشىلعان شاتتىق ەشمۇراتقىزى.

ورايى كەلگەندە ايتا كەتەيىك، شاتتىق ەشمۇراتقىزى 1962 جىلدىڭ 29-جەلتوقسانىندا اتىراۋ وبلىسى قۇرمانعازى اۋدانىندا تۋعان (بۇرىنعى گۋرەۆ وبلىسى، تەنىز اۋدانى، گانيۋشكين اۋىلى). قازاقتىڭ اقىن قىزى فاريزا وڭعارسىنوۆامەن ءبىر مەكەندە دۇنيەگە كەلگەن. اكەسى ەشمۇرات پەن اناسى الما اپايدىڭ ۇلتتىق ءتالىم-تاربيەسىندە جەتىلگەن. ونىڭ مەيىرىم تۇنعان جۇزىنە قاراعانىمىزدا فاريزا وڭعارسىنوۆانىڭ "قۇم ىشىندە ءبۇر جارعان گۇل" جىر-تىركەسى ويعا ورالادى.

اتالمىش ۆيدەوسى فەيسبۋك بەلسەندىسى قۋاندىق تاناباس ءبولىستى. ەڭبەكتىڭ كوركىن قىزدىرىپ، تابىسىن حالقىنىڭ يگىلىگى جولىندا جۇمساعان جانعا قازاق ەلىنىڭ تۇكپىر-تۇكپىرىنەن تىلەكتەستىك تانىتىپ جاتقاندار وتە كوپ:

"كەزىندە، تابيعاتى اسەم، تاماشا كورىكتى بولعان تەڭىز اۋدانى، گۋرەۆ وبلىسىندا دۇنيەگە كەلىپ، رۋحاني بايلىقپەن وسكەن، ءيمانجۇزدى، يبالى، تاربيەلى شاتتىق ەشمۇراتقىزىمەن زامانداسپىن. اللانىڭ قالاۋىمەن كەرەكۋ وڭىرىندە ءوز تەڭىن تاۋىپ، شاڭىراق قۇردى. امان-ەسەن ءجۇرىڭىز!",

"قازاقتىڭ جاناشىرلارىنا مىڭ العىس! قازاقتىڭ قىزىنىڭ كاسىبى دوڭگەلەنە بەرسىن! امان بولىپ، ۇرپاعىنىڭ قىزىعىنا كۋا بولىپ، ۇزاق جاساپ، عاسىردى ەڭسەرسىن!",

ء"جۇزى جىلى حانىم ەكەنسىز. اللا رازى بولسىن!" دەپ جازدى وقىرماندار.

"ادىرنا" ۇلتتىق پورتالى

 

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket