قوستانايدا ءالى قولدانىسقا بەرىلمەگەن پاتەرلەردە مۇز قاتىپ قالعان

2917
Adyrna.kz Telegram

ءۇش جىل بۇرىن قوستاناي قالاسىندا «قوناي» دەگەن اتاۋمەن جاڭا شاعىن اۋداننىڭ قۇرىلىسى باستالعان ەدى. سودان بەرى بۇگىنگە دەيىن 5 قاباتتى 19 ءۇي سالىنعان. الايدا ءۇيدىڭ جاعدايى ءماز ەمەس. الەۋمەتتىك جەلىلەردە جاڭا سالىنعان، بىراق پايدالانۋعا بەرىلمەگەن پاتەردىڭ سۋرەتتەرى تاراپ كەتتى، دەپ حاباردايدى “ادىرنا” ۇلتتىق پورتالى.

سۋرەتتەردە بولمەنىڭ قاق ورتاسىندا ەدەننەن توبەگە دەيىن مۇز قاتىپ تۇر.

قوستاناي اكىمدىگى وسى جاعدايدى ءتۇسىندىردى.

"قوناي شاعىن اۋدانىنداعى 21 ورام № 2, 3 ۇيلەرىنىڭ قۇرىلىسىن "مارال قۇرىلىس" جشس مەردىگەر ۇيىمى سالىپ جاتىر. قازان ايىندا بۇل ۇيىممەن شارت بۇزىلدى، سەبەبى ولار ءوز مىندەتتەرىن ورىندامادى، مەملەكەتتىك ساتىپ الۋدا جاۋاپسىز قاتىسۋشى دەپ تانىلدى. جاسالعان شارتقا سايكەس، قۇرىلىستى اياقتاۋ ءۇشىن جاڭا مەردىگەر ۇيىمدى انىقتاۋ كەزەڭىندە ءۇيدى "نۇر ساقشى" كۇزەت فيرماسى كۇزەتىپ جاتىر. ءۇيدى تەكسەرۋ كەزىندە جىلۋ تەك جەرتولەدە قوسىلعانى انىقتالدى. جىلىتۋ جۇيەسىندەگى ماەۆسك كرانىنان سۋ اققان", - دەدى اكىمدىكتەن.

انىقتالعانداي، قالالىق قۇرىلىس ءبولىمى 13 جەلتوقساندا وسى جۇمىستاردى اياقتايدى.

"وسى وقيعا تۋرالى ۋاقتىلى حابارلاماعان كۇزەت ۇيىمىنا ءتيىستى حات جولداندى. قازىرگى ۋاقىتتا اتالعان ۇيلەردىڭ قۇرىلىسى بويىنشا جۇمىستاردى اياقتاۋعا مەملەكەتتىك ساتىپ الۋ جاريالاندى، مەردىگەر ۇيىم انىقتالعاننان كەيىن تۇرعىنداردى قونىستاندىرعانعا دەيىنگى بارلىق اقاۋلار جويىلادى", - دەپ اتاپ ءوتتى قالالىق اكىمدىكتە.

 

پىكىرلەر