ەلورداداعى كارديوحيرۋرگيا ورتالىعىندا وڭالتۋدان ءوتىپ جاتقان بالالار «سامۇرىق-قازىنا» اق كومپانيالار توبىنان جاڭاجىلدىق سىيلىققا يە بولدى. بۇل جەردە دۇنيەگە كەلگەنىنەن جۇرەك اۋرۋى بار بالالار ەم الۋدا.
جالپى سانى 30 ءبۇلدىرشىندى قۇرايتىن ولارعا توپتىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ باستاماشىلىق جوباسى اياسىندا تانىمال دۇكەندەردىڭ بىرىنەن ساۋدا جۇرگىزۋگە مۇمكىندىك بەرەتىن 50 مىڭ تەڭگەلىك سەرتيفيكاتتار تابىستالدى.
«سامۇرىق-قازىنا» اق قوعاممەن بايلانىس، الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ بالالاردىڭ جاڭا جىلدا تەزىرەك ساۋىعىپ كەتۋىن تىلەپ، مەيراممەن قۇتتىقتادى. سونداي-اق، اتا-انالارمەن جانە مەديتسينا قىزمەتكەرلەرىمەن تىلدەستى.
«جۇرەك ادام اعزاسىنىڭ ەڭ ماڭىزدى بولىگى. وعان نازار دا ەرەكشە بولىپ، ءبارىمىز ونىڭ اقاۋسىز ءارى توقتاۋسىز سوعىپ تۇرۋىن قالايمىز. قازىر ەلىمىزدە مەديتسينا سالاسى جوعارى دەڭگەيدە. مىقتى قۇرال-جابدىقتار بار. دارىگەرلەرىمىز دە وتە بىلىكتى. سوندىقتان وسى سىناقتان جىلدام ءوتىپ، ومىرلەرىڭىزدە جارقىن كەزەڭدەر مول بولۋىن تىلەيمىن!»، - دەدى ول سىيلىقتاردى تابىستاۋ بارىسىندا.
ەسكە سالا كەتسەك، قور باسشىلارى بۇعان دەيىن ەڭبەك ۇجىمدارى اتىنان استاناداعى انا مەن بالا ۇلتتىق عىلىمي ورتالىعى، پسيحولوگيالىق-پەداگوگيكالىق تۇزەتۋ كابينەتى مەن الماتى قالاسىنداعى پەدياتريا جانە بالالار حيرۋرگياسى عىلىمي ورتالىعىنداعى جالپى سانى 800-دەن استام بالاعا جاڭاجىلدىق سىيلىقتار مەن سەرتيفيكاتتار، تاتتىلەر جيىنتىعىن تارتۋ ەتىپ، مەرەكەلىك كوڭىل-كۇيگە بولەدى.
