ۇقك الماتى دەپارتامەنتىنىڭ اقپاراتىنا قاراعاندا، ارنايى قىزمەت الماتىدا وپەراتسيا جۇرگىزىپ، "قازاقستان ازاماتتارىنان قۇرالعان قىلمىستىق توپتىڭ اۋە تەحنيكالارىنا ارنالعان اۆياتسيالىق قۇرال-جابدىقتى ەلدەن زاڭسىز شىعارماق بولعان ارەكەتىن توقتاتقان".
دەپارتامەنت اقپاراتىنا قاراعاندا، "قازاقستاننان زاڭسىز شىعارىلماق بولعان" تەحنيكانىڭ قۇنى 122 مىڭ دوللاردان اسادى. بۇل فاكت بويىنشا قىلمىستىق كودەكستىڭ 286 بابىنىڭ 2-ءبولىمى ("اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى") بويىنشا ءىس قوزعالعان.
كۇدىكتىلەر ۇقك-ءنىڭ تەرگەۋ اباقتىسىنا قامالعان. ارنايى قىزمەت كۇدىكتىلەردىڭ قانشا ادام ەكەنىن جانە ناقتى قاي ەلگە اسكەري تەحنيكا شىعارماق بولعانىن ايتپادى.
