تالدىقورعان قالاسىنداعى نازارباەۆ زياتكەرلىك مەكتەبىنىڭ 9-سىنىپ وقۋشىسى تيمۋر مۇقاتاەۆ جاس بولسا دا تاجىريبەسى مول سپورتشى، قازىرگى تاڭدا تەننيستەن جاتتىقتىرۋشى.
بۇگىن سەنىڭ ەرتەڭىڭ. كەيىپكەرىمىز وسى كرەدوعا قاشاندا مويىنسۇنعان. 7 جاسىنان تەننيسپەن اينالىسا باستادى. 14 جاسقا دەيىنگى جاسوسپىرىمدەر اراسىنداعى قازاقستاننىڭ ەڭ ۇزدىك 5 تەننيسشىسىنىڭ قاتارىنا ەندى. ال بۇگىن تيمۋردان كىشكەنتاي تەننيسشىلەر ءتالىم الۋدا.
تيمۋر سۇحباتىندا مانسابى، جەتىستىكتەرى، جاڭا ماقساتتارى مەن ارماندارى تۋرالى ايتىپ بەردى.
مەنى تەننيسكە اتا-انام اكەلدى. وسى ۋاقىت ىشىندە بىرنەشە تالىمگەرىم بولدى. ارينە، ولاردىڭ ارقايسىسى مەنىڭ كاسىبي سپورتشى بولىپ قالىپتاسۋىما بەلگىلى ءبىر ۇلەس قوستى. ولار ماعان تەننيسكە دەگەن شىنايى سۇيىسپەنشىلىكتى وياتىپ قانا قويماي، سوعۋ تەحنيكاسىن، ويىن تاكتيكاسىن دا ۇيرەتتى، — دەيدى جاس جاتتىقتىرۋشى.
8 جاسىندا تيمۋر جارىستارعا قاتىسا باستادى. ءبىرىنشى جۇلدە – 2014 جىلى قالالىق تەننيس جارىسىندا ءىىى ورىن. قازىر ول 15 جاستا، وسى ۋاقىت ىشىندە ول كوپتەگەن تۋرنيرلەردە وينادى. 2019 جىلى قازاقستان چەمپيونى، رەسپۋبليكانىڭ بىرنەشە دۇركىن جەڭىمپازى جانە جۇلدەگەرى اتاندى.
تۋعان جەرى تالدىقورعانداعى «جەتىسۋ» تەننيس ورتالىعىندا ءۇشىنشى جىل جاتتىقتىرۋشى قاتارىندا. ول ءوزىنىڭ سۇيىكتى ىسىمەن اينالىسادى - بالالار مەن جاسوسپىرىمدەرگە تەننيس ۇيرەتەدى.
مەن ادامدارمەن جۇمىس ىستەگەندى جاقسى كورەمىن! بىلگەنىمنىڭ ءبارىن ۇيرەتەمىن. بالالاردى 7 جاسىنان قابىلدايمىن. العاشقى جاتتىعۋلاردا راكەتكاممەن ويناۋعا رۇقسات بەرەم. مەنىڭ ماقساتىم - بەدەلدى جانە سۋپەر كاسىبي جاتتىقتىرۋشى بولۋ. شاكىرتتەرىمنىڭ تەننيستەن بارىنشا ناتيجەگە قول جەتكىزگەنىن قالايمىن، — دەپ سۇحباتىن زياتكەرلىك مەكتەبىنىڭ 9-سىنىپ وقۋشىسى تيمۋر مۇقاتاەۆ تۇيىندەدى.
