Taldyqorǵan qalasyndaǵy Nazarbaev Zııatkerlik mektebiniń 9-synyp oqýshysy Tımýr Muqataev jas bolsa da tájirıbesi mol sportshy, qazirgi tańda tennısten jattyqtyrýshy.
Búgin seniń erteńiń. Keıipkerimiz osy kredoǵa qashanda moıynsunǵan. 7 jasynan tennıspen aınalysa bastady. 14 jasqa deıingi jasóspirimder arasyndaǵy Qazaqstannyń eń úzdik 5 tennısshisiniń qataryna endi. Al búgin Tımýrdan kishkentaı tennısshiler tálim alýda.
Tımýr suhbatynda mansaby, jetistikteri, jańa maqsattary men armandary týraly aıtyp berdi.
Meni tennıske ata-anam ákeldi. Osy ýaqyt ishinde birneshe tálimgerim boldy. Árıne, olardyń árqaısysy meniń kásibı sportshy bolyp qalyptasýyma belgili bir úles qosty. Olar maǵan tennıske degen shynaıy súıispenshilikti oıatyp qana qoımaı, soǵý tehnıkasyn, oıyn taktıkasyn da úıretti, — deıdi jas jattyqtyrýshy.
8 jasynda Tımýr jarystarǵa qatysa bastady. Birinshi júlde – 2014 jyly qalalyq tennıs jarysynda III oryn. Qazir ol 15 jasta, osy ýaqyt ishinde ol kóptegen týrnırlerde oınady. 2019 jyly Qazaqstan Chempıony, respýblıkanyń birneshe dúrkin jeńimpazy jáne júldegeri atandy.
Týǵan jeri Taldyqorǵandaǵy «Jetisý» tennıs ortalyǵynda úshinshi jyl jattyqtyrýshy qatarynda. Ol óziniń súıikti isimen aınalysady - balalar men jasóspirimderge tennıs úıretedi.
Men adamdarmen jumys istegendi jaqsy kóremin! Bilgenimniń bárin úıretemin. Balalardy 7 jasynan qabyldaımyn. Alǵashqy jattyǵýlarda raketkammen oınaýǵa ruqsat berem. Meniń maqsatym - bedeldi jáne sýper kásibı jattyqtyrýshy bolý. Shákirtterimniń tennısten barynsha nátıjege qol jetkizgenin qalaımyn, — dep suhbatyn Zııatkerlik mektebiniń 9-synyp oqýshysy Tımýr Muqataev túıindedi.
