قازاقستان قارجى ءمينيسترى ءاليحان سمايىلوۆ ۇكىمەت "تسەسنابانكتىڭ" جاعدايىن جاقسارتۋ شارالارىن جاساۋدى جوسپارلاپ وتىرعانىن راستادى.
ازاتتىق ءتىلشىسى مينيستردەن "پروبلەمالىق نەسيەلەر قورى" "تسەسنابانك" اكتيۆتەرىن ساتىپ الۋدى قارجىلاندىرۋ ءۇشىن جەرگىلىكتى قور بيرجاسىنا 604 ميلليارد تەڭگەنىڭ وبليگاتسياسىن ورنالاستىرادى" دەگەن اقپاراتتىڭ قانشالىقتى راس ەكەنىن سۇراعان.
مينيستر سمايىلوۆ ء"بىز بۇل تۋرالى ءالى كەلىسىمگە قول قويعان جوقپىز. بىراق ونداي جوسپارىمىز بار. بانكتىڭ جاعدايى ناشار ەمەس، بىراق وسىنداي شارالار جاساۋ كوزدەلىپ وتىر" دەدى.
بۇعان دەيىن Reuters اگەنتتىگى قازاقستان ۇكىمەتىندەگى دەرەككوزدەرىنە سىلتەمە جاساپ، استانا "تسەسنابانككە" قوسىمشا قارجى كەرەك دەپ، وعان ينۆەستور ىزدەپ جاتقانىن حابارلاعان. اگەنتتىك دەرەككوزىنىڭ مالىمەتىنشە، ۇكىمەت پەن ۇلتتىق بانك وكىلدەرى بىلتىردان بەرى قازاقستاننىڭ ءۇش بانكىمەن كەلىسسوز جۇرگىزىپ جاتىر.
بۇعان دەيىن قازاقستاننىڭ شالاجانسار بانكتەرىنە بىرنەشە رەت قارجىلاي كومەك جاسالعانى حابارلانعان. كومەك العان بانكتەردىڭ اراسىندا قازاقستانداعى ەكىنشى ءىرى كرەديتور – "تسەسنابانك" تە بار. بۇل بانك "تسەسنا" كورپوراتسياسىنا كىرەدى، ال ونى وسى كەزگە دەيىن ادىلبەك جاقسىبەكوۆتىڭ ۇلى داۋرەن باسقارىپ كەلگەن.
"تسەسنابانك" قىركۇيەكتىڭ باسىندا ۇلتتىق بانكتەن قىسقا مەرزىمگە 150 ميلليارد تەڭگە نەسيە العانىن راستاعان. نەسيە "قوسىمشا وتىمدىلىك قورىن قامتاماسىز ەتۋ ءۇشىن" بەرىلگەن. بانك 6 قىركۇيەكتەگى جاعداي بويىنشا نەسيەنىڭ جارتىسىنان كوبى - 100 ميلليارد تەڭگەنى ء"وز ەسەبىنەن وتەگەنىن" حابارلاعان.
2017 جىلى بانك سەكتورىن جاقسارتۋ باعدارلاماسى اياسىندا "تسەسنابانككە" مەملەكەتتەن جەڭىلدىكپەن 100 ميلليارد تەڭگە بەرىلگەن ەدى.
"ازاتتىق" راديوسى
