«Alumni NIS» قاعيداتتارى نازارباەۆ زياتكەرلىك مەكتەپتەرى تۇلەكتەرىنىڭ فرانكفۋرت قالاسىنداعى كەزدەسۋىندە ايتىلدى

2467
Adyrna.kz Telegram

«Alumni NIS» قاعيداتتارىنا اينالعان OTANYŃDY SUI, ÄLEMDI ÖZGERT, ADAL BOL سوزدەرى نازارباەۆ زياتكەرلىك مەكتەپتەرى تۇلەكتەرىنىڭ فرانكفۋرت قالاسىنداعى قازاقستان رەسپۋبليكاسىنىڭ باس كونسۋلدىعىندا وتكەن كەزدەسۋىندە ايتىلدى.

– NIS-ءتىڭ مەن ءۇشىن ناعىز الەۋمەتتىك ليفتكە اينالىپ، ۇلكەن مۇمكىندىكتەر بەرگەن مەكەن ەكەنىن ماقتانىشپەن ايتۋ ءۇشىن وسىنداي تاماشا ءساتتى كۇتتىم، – دەپ مويىندادى Hochschule Rhein-Waal ستۋدەنتى امينا باقتياروۆا: مەن وسكەمەن قالاسىنداعى زياتكەرلىك مەكتەپكە شىعىس قازاقستان وبلىسىنداعى قاسىم قايسەنوۆ اتىنداعى قاراپايىم اۋىلدىق مەكتەپتەن ءتۇستىم، اعىلشىن ءتىلى مەن حيميا پانىنەن قيىندىقتار بىردەن پايدا بولدى. ءبىر شەت ءتىلىن مەڭگەرۋدىڭ ازدىق ەتەتىنىن ءتۇسىنىپ، نەمىس تىلىنە قىزىعا باستادىم، 12-سىنىپتا IELTS ەمتيحانىنان 8.0 بالل الىپ، قاتارىنان بىرنەشە ۋنيۆەرسيتەتكە، سونىڭ ىشىندە ەكونوميكا جوعارى مەكتەبىنە گرانتقا شاقىرتۋ الدىم. مەن گەرمانياداعى رەين-ۆاال قولدانبالى عىلىمدار ۋنيۆەرسيتەتىن تاڭدادىم، سولتۇستىك رەين-ۆەستفالياداعى كلەۆە قالاسىندا ورنالاسقان. قازىرگى ۋاقىتتا بيوينجەنەريا سالاسىندا وقيمىن، قازاقستاندىق عىلىمدا، سونىڭ ىشىندە فارماتسەۆتيكادا ءوزىمنىڭ قولتاڭبامدى قالدىرۋدى ارماندايمىن. بوس ۋاقىتىمدا شىعارماشىلىقپەن اينالىسىپ، اعىلشىن تىلىندە ولەڭدەر جازامىن، ەكى كىتاپ شىعارىپ تا ۇلگەردىم. اۋىلىمداعى مەكتەپتە وقىپ جۇرگەن كەزدە شەتەلدە ءبىلىم الىپ، بىرنەشە ءتىلدى جەتىك مەڭگەرەمىن دەگەن وي مۇلدە بولماعان. NIS ماعان ۇلكەن مۇمكىندىكتەر سىيلادى، زياتكەرلىك مەكتەپكە تۇسكەننەن كەيىن وزىمە دەگەن سەنىمىم ارتىپ، ءبىزدىڭ باستى قاعيداتتارىمىزعا اينالعان «وتان الدىنداعى جاۋاپكەرشىلىك»، «اكادەميالىق ادالدىق»، «قوعامعا قىزمەت ەتۋ» ۇعىمدارىن بويىما ءسىڭىردىم.

امينانىڭ جەتىستىگى – جارقىن، يلانىمدى، ەستە قالارلىق جانە ... بارلىق NIS تۇلەكتەرىنە ءتان. نازارباەۆ زياتكەرلىك مەكتەپتەرى ءوز وقۋشىلارىنا بىرەگەي ءۇمىت پەن مۇمكىندىك بەردى.  كەزدەسۋ قاتىسۋشىلارى گەرمانياداعى بيوحيميا، تسيفرلىق تەحنولوگيا، ماشينا جاساۋ، ينجەنەريا، لوگيستيكا جانە ەكولوگيا سالالارىندا مامانداندىرىلعان ۇزدىك ۋنيۆەرسيتەتتەردە ءبىلىم الۋدا. 

بەيبارىس ەسەنگەلدين ەكى جىل بۇرىن شىمكەنتتەگى فيزيكا-ماتەماتيكا باعىتىنداعى NIS-ءتى ءتامامدادى، مەكتەپ پرەزيدەنتى بولدى، فرانكفۋرتقا ۆەنگريانىڭ دور شاھارىنان كەلدى، Szent Istvan University-دە وقيدى. جوعارى وقۋ ورنىندا بەيبارىستىڭ جاراتىلىستانۋ-ماتەماتيكالىق باعىتتاعى اكادەميالىق دايىندىعى عانا ەمەس، NIS-ءتىڭ جان-جاقتى ءبىلىمى مەن ماڭىزدى ادامي قابىلەتتەرگە باۋليتىنى تاڭ قالدىردى. ال تالدىقورعانداعى زياتكەرلىك مەكتەپ تۇلەگى، بۇگىندە Technische Hochschule Würzburg-Schweinfurt ستۋدەنتى نازيرا ومىربەكوۆاعا اتا-اناسى وسى كەزدەسۋگە بارۋعا كەڭەس بەرگەن. الماتىداعى فيزيكا-ماتەماتيكا باعىتىنداعى NIS تۇلەكتەرى ەليكاي اتاباەۆا ميۋنحەن تەحنيكالىق ۋنيۆەرسيتەتىندە، ءاديا بەكداۋلەتوۆا شۆاينفۋرت قولدانبالى عىلىمدار ۋنيۆەرسيتەتىندە، مادينا قاراقۇلوۆا ميۋنحەندەگى ليۋدۆيگ جانە ماكسيميليان ۋنيۆەرسيتەتىندە وقيدى. كريستينا مۋليار پاۆلودارداعى NIS تۇلەكتەرىنىڭ العاشقى لەگىن تانىستىردى، بۇگىندە گامبۋرگتە جۇمىس ىستەيدى، مەكتەپتەگى اكادەميالىق دايىندىعىنىڭ ارقاسىندا ۋنيۆەرسيتەتتەگى زامانداستارىنان ەرەكشەلەنگەنىن مويىندادى. پەتروپاۆلداعى NIS-تەن انگەلينا بەندەر Technische Universität Munchen-دە تسيفرلىق تەحنولوگيالار سالاسىن مەڭگەرگەن، بۇگىندە ول گەرمانياداعى ەڭ ءىرى ساقتاندىرۋ كومپانيالارىنىڭ بىرىندە جۇمىس ىستەيدى جانە سۇيىكتى مەكتەبىنەن مۇمكىندىكتەر مەن ۇلكەن قولداۋ العانىن جاسىرمايدى. ورالداعى NIS تۇلەگى دانەل بەگاليەۆ براندەنبۋرگ قالاسىنان كەلدى، ول كوتبۋس-زەنفتەنبەرگ تەحنيكالىق ۋنيۆەرسيتەتىندە قورشاعان ورتانى باسقارۋ ماماندىعى بويىنشا وقيدى. ءاليحان نۇرداۋلەت ەلورداداعى فيزيكا-ماتەماتيكا زياتكەرلىك مەكتەبىن بىتىرگەن، Karlsruher Institut fur Technologie-دە ماشينا جاساۋ ماماندىعىندا ءبىلىم الۋدا.

ابدۋللاكيم زاميربەك ۋلۋ كەزدەسۋدىڭ كۇتپەگەن ءارى ەرەكشە قوناعىنا اينالدى. ول – بولاشاق داتا-اناليتيك، The University of Messina-دا ءبىلىم الۋدا. بىشكەك حالىقارالىق مەكتەبىنىڭ تۇلەگى ابدۋللاكيم نازارباەۆ زياتكەرلىك مەكتەپتەرىنىڭ تۇلەكتەرىنە ءتان قاسيەتتەردىڭ ارقاسىندا تابىسقا جەتۋدىڭ جولىن ءتۇسىنۋ ءۇشىن يتاليادان فرانكفۋرتقا ارنايى كەلدى. ەۋروپانىڭ وزىق ۋنيۆەرسيتەتتەرىنىڭ ۇزدىك ستۋدەنتتەرى زياتكەرلىك مەكتەپتى ءتامامدادى، ولار NIS باۋىرلاستىعىن ماقتان تۇتادى، قيىن ۋاقىتتا ءبىر-بىرىنە قولداۋ كورسەتىپ، جەكە وقيعالارىمەن شابىتتاندىرۋعا ارقاشان دايىن.

– زياتكەرلىك مەكتەپتەر تۇلەكتەرىنىڭ باستى ارتىقشىلىعى – اكادەميالىق جەتىستىكتەر ەمەس، ادامي قاسيەتتەر، – دەپ مويىندادى ابدۋللاكيم.

گەرمانيانىڭ ءار جەرىندە تۇرىپ، ءبىلىم الىپ جاتقان كەزدەسۋ قاتىسۋشىلارى العاش رەت فرانكفۋرتتەگى قازاقستان رەسپۋبليكاسىنىڭ باس كونسۋلدىعىندا جينالدى. ديپلوماتتار تاراپىنان جاسالعان جايلى ءارى وتباسىلىق اتموسفەرا، شىنايى ديالوگ پەن ءدامدى داستارحان ۇيلەرىنەن جىراقتا جۇرگەن بالالاردىڭ كوڭىلىنەن شىقتى.

– بۇگىندە گەرمانيادا ءبىلىم الىپ جاتقان ءاربىر قازاقستاندىق ستۋدەنت – ءوز ەلىنىڭ وكىلەتتى وكىلى، ولار اباي، احمەت بايتۇرسىنوۆ، ءاليحان بوكەيحانوۆ، مىرجاقىپ دۋلاتوۆ جانە قازاقتىڭ باسقا دا ءبىرتۋار پەرزەنتتەرىنىڭ رۋحاني مۇراسىن الەمگە تانىتۋدا، – دەپ اتاپ ءوتتى فرانكفۋرت قالاسىنداعى باس كونسۋل تاۋبولدى ۇمبەتباەۆ.

– گەرمانياداعى كەزدەسۋ جەلتوقسان-قاڭتار ايلارىندا NIS تۇلەكتەرىنىڭ تۋعان جەرىندە باسىن قوسقان ءبىرىنشى «SAMGAU» فورۋمىنىڭ زاڭدى جالعاسى، – دەدى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا: زياتكەرلىك مەكتەپتىڭ ءاربىر وقۋشىسى، مۇعالىمى، اتا-اناسى ءبىزدىڭ تۇلەكتەرىمىزدىڭ قازاقستاندى الەمگە لايىقتى تانىتىپ، «Alumni NIS» قاعيدالارىنا اينالعان «وتاندى ءسۇيۋ»، «الەمدى وزگەرتۋ»، «ناعىز تۇلعا» بولۋدى ناسيحاتتايتىنىن ماقتان تۇتادى.

 

پىكىرلەر