بۇگىن «قازاق» قوعامدىق-ساياسي جانە ادەبي-مادەني گازەتىنىڭ جارىققا شىققانىنا 110 جىل تولىپ وتىر. وسىعان قاتىستى قر مەملەكەتتىك كەڭەسشىسى ەرلان قارين ءوزىنىڭ ينستاگرام پاراقشاسىندا پىكىر ءبىلدىردى، دەپ جازادى "ادىرنا" ۇلتتىق پورتالى.
"سۋرەتشى ەۆگەني كيمنىڭ «قازاق» گازەتىنىڭ باسپاحاناسىندا» اتتى تۋىندىسى. احاڭ، الەكەڭ، جاحاڭدار تۇڭعىش ۇلتتىق باسىلىم «قازاق» گازەتىنىڭ كەزەكتى ءنومىرىن ازىرلەپ، باسپاحاناعا تاپسىرىپ تۇر. ۇستەل ۇستىندە جاڭا باسىلىپ شىققان گازەت جاتىر. ارتقى جاقتاعى فوندا باسپاگەرلەر «قازاقتىڭ» تولىق تيراجىن شىعارىپ تۇر. ۇلت ءباسپاسوزىنىڭ العاشقى قادامى، ىرگەتاسى قالانىپ جاتقان ءساتى وتە ءساتتى بەينەلەنگەن. بۇگىن باستاۋىندا ءاليحان بوكەيحان، احمەت بايتۇرسىنۇلى، مىرجاقىپ دۋلاتۇلى تۇرعان «قازاق» قوعامدىق-ساياسي جانە ادەبي-مادەني گازەتىنىڭ جارىققا شىققانىنا 110 جىل تولىپ وتىر. «قازاق» گازەتى سول ءداۋىردىڭ مىنبەرى ەدى. شاكارىم قۇدايبەردىۇلى، مۇستافا شوقاي، مۇحامەدجان تىنىشبايۇلى، عۇمار قاراش، ماعجان جۇمابايۇلى جانە باسقا دا زيالىلار ەل بولاشاعى، حالىق قامى تۋرالى ويلارىن وسى گازەتتە جاريالاپ، جۇرتشىلىققا جەتكىزىپ وتىردى. سوندىقتان «قازاق» وتكەن عاسىردىڭ باسىندا شىن مانىندەگى ۇلتتىڭ ۇنىنە اينالدى. بار-جوعى بەس جىل عانا جارىق كورسە دە مەملەكەت ومىرىندە وشپەس ءىز قالدىرعان «قازاق» گازەتىنىڭ مۇراسى عاسىردان-عاسىرعا جالعاسىپ، ۇرپاق ساناسىندا ءسات سايىن جاڭعىرىپ وتىرماق. ۇلى تۇلعالارىمىزدىڭ قولتاڭباسى قالعان ۇلت باسىلىمىنىڭ مەرەيتويى قۇتتى بولسىن!", - دەپ جازدى ەرلان قارين.
"ادىرنا" ۇلتتىق پورتالى
