مەملەكەت باسشىسى قاسىم-جومارت توقاەۆ الاپات جەر سىلكىنىسىنەن كەيىن سالدارىن جويۋ ءۇشىن ۇكىمەتكە تۇركيا رەسپۋبليكاسىنا كومەك كورسەتۋدى تاپسىردى. ۇكىمەتىنىڭ ءوتىنىشى بويىنشا زارداپ شەككەن وڭىرلەرگە قازاقستاندىق قۇتقارۋشىلار مەن دارىگەرلەر ۇشادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
بۇعان دەيىن سىرتقى ىستەر مينيسترلىگى جەر سىلكىنىسى كەزىندە زارداپ شەككەندەر قازاقستاندىقتار تۋرالى اقپاراتتىڭ كەلىپ تۇسپەگەنىن مالىمدەگەن.
"سىرتقى ىستەر مينيسترلىگى مەن توتەنشە جاعدايلار مينيسترلىگى تۇرىك بيلىگىمەن بايلانىس ورناتتى. جاقىن ارادا تۇركيا ۇكىمەتىنىڭ ءوتىنىشى بويىنشا زارداپ شەككەن وڭىرلەرگە قازاقستاندىق قۇتقارۋشىلار مەن دارىگەرلەر ۇشادى", – دەلىنگەن اقوردا حابارلاماسىندا.
جويقىن جەر سىلكىنىسىنەن كەيىن مالىمدەمە جاساعان تۇركيا پرەزيدەنتى رەدجەپ تايىپ ەردوعان وپات بولعاندار سانى 912 ادامعا جەتكەنىن ايتتى. تاعى 5 385 ادام ءتۇرلى جاراقات العان.
ايتا كەتەيىك، بۇگىن، 6 اقپاندا بولعان ءزىلزالا 1939 جىلدان كەيىن بولعان ەڭ ءىرى جەر سىلكىنىسى. 1939 جىلى جەر سىلكىنىسىنەن 33 مىڭ ادام كوز جۇمعان.
