ء"بىز ەندى بىلاي جاسايمىز. ولارعا ءدال وزدەرى سياقتى جاۋاپ بەرەمىز. امەريكالىق ارىپتەستەر كەلىسىمنەن شىعاتىنىن جاريالادى، ءبىز دە سولاي ىستەيمىز" دەدى پۋتين سىرتقى ىستەر ءمينيسترى سەرگەي لاۆروۆ جانە قورعانىس ءمينيسترى سەرگەي شويگۋمەن كەزدەسۋدە.
پرەزيدەنت سونىمەن بىرگە ەكى ۆەدومستۆودان بۇدان بىلاي اقش-پەن قارۋسىزدانۋعا قاتىستى كەلىسسوز جۇرگىزۋ تۋرالى باستاما كوتەرمەۋىن سۇراعان. بىراق رەسەيدىڭ ۇسىنىستارى ءوز كۇشىندە قالادى دەپ ايتقان.
"بۇل سالادا بارلىق ۇسىنىستارىمىز بۇرىنعىداي كۇشىندە قالادى، كەلىسسوزگە اشىقپىز" دەدى پۋتين.
جۇما كۇنى اقش پرەزيدەنتى دونالد ترامپ 2 اقپاننان باستاپ اقش كەلىسىمگە قاتىستى مىندەتتەمەلەرىن ورىنداۋدى توقتاتادى جانە كەلىسىمنەن شىعۋ پروتسەدۋراسىن باستايدى دەپ مالىمدەگەن.
مەملەكەت حاتشىسى مايك پومپەو اقش-تىڭ التى ايدان سوڭ كەلىسىمنەن مۇلدەم شىعاتىنىن، بىراق رەسەيمەن قارۋلانۋدى باقىلاۋ جونىندە كەلىسسوز جۇرگىزۋگە ءازىر ەكەنىن جەتكىزگەن.
اقش مۇنداي شەشىم قابىلداردان بۇرىن كەلىسىم شارتتارىن ورىنداۋ ماسەلەسىن رەسەيمەن ۇزاق تالقىلاعان. ەكى ەل وكىلدەرى سوڭعى رەت 31 قاڭتار كۇنى پەكيندە كەزدەسىپ، ءتىل تابىسا الماعان.
بۇۇ-نىڭ باس حاتشىسى انتونيۋ گۋتتەريش ماسكەۋ مەن ۆاشينگتون جارتى جىل ىشىندە جاڭا كەلىسىم بەكىتەدى دەپ ۇمىتتەنەتىنىن ايتتى.
1987 جىلى اقش پەن سوۆەت وداعىنىڭ باسشىلارى قول قويعان "ورتا جانە قىسقا قاشىقتىققا ارنالعان يادرولىق زىمىرانداردى جويۋ" كەلىسىمى ەۋروپا مەن وزگە دە ايماقتاعى بەيبىتشىلىكتىڭ كەپىلى رەتىندە قابىلدانىپ كەلگەن. بىراق سوڭعى ۋاقىتتا ۆاشينگتون مەن ماسكەۋ بۇل قۇجاتقا قاتىستى كەلىسپەي قالىپ جۇرگەن.
اقش پەن ناتو 9M729 اتتى يادرولىق قاناتتى زىمىران جاساۋ ارقىلى رەسەي تاريحي كەلىسىمدى بۇزدى دەپ ايىپتاعان. ال رەسەي "بۇل زىمىراننىڭ ۇشۋ الىستىعى 500-دەن اسپايدى، سايكەسىنشە كەلىسىم شارتتارىن بۇزعان جوقپىز" دەگەن.
"ازاتتىق" راديوسى
