20 اقپان كۇنى الماتى قالاسىنداعى EverJazz دجاز-كلۋبىندا تۇركياداعى ءزىلزالادان زارداپ شەككەندەردى قولداۋعا ارنالعان قايىرىمدىلىق كەشى وتەدى. بيلەت ساتىلىمىنان تۇسكەن جانە كونتسەرت ۋاقىتىندا جينالعان بارلىق قارجى AFAD (اپاتتار مەن توتەنشە جاعدايلاردى جويۋ باسقارماسى) ەسەپشوتىنا اۋدارىلادى.
شارانى 2010 جىلى حالىقارالىق تۇركسوي ۇيىمى اياسىندا قۇرىلعان حالىقارالىق جاستار كامەرالىق وركەسترى ۇيىمداستىرادى. اكتسياعا تۇركيانىڭ الماتى قالاسىندا باس كونسۋلدىعى قولداۋ كورسەتتى.
«بۇگىن ءبىزدىڭ جاقىن باۋىرلارىمىز، تۋىستاس تۇرىك ەلى تابيعي اپاتتان زارداپ شەگىپ، اۋىر كۇندەردى باستان وتكەرۋدە. مۇنى بارلىق اقپارات قۇرالدارىنان كورىپ وتىرسىزدار. تۇرىك الەمىنە ءاردايىم قول ۇشىن سوزۋعا دايىن تۇراتىن تۇركيا ەلى بۇگىندە ءبىزدىڭ كومەككە مۇقتاج بولىپ وتىر. باۋىرلارىمىزعا تەك قارجىلاي كومەككە عانا ەمەس، مورالدىق قولداۋ اسا قاجەت. ولار ءبىزدىڭ جۇرەكتەن شىققان جىلى سوزدەرىمىز بەن تۋىستىق قولداۋىمىزدى سەزىنۋلەرى كەرەك. بۇل قادامىمىز ولارعا ءۇمىت سىيلاپ، جىگەرلەندىرەدى. ءبىز، حالىقارالىق تۇركسوي ۇيىمى ءتۇبى ءبىر تۇركى ەلدەرىنىڭ ونەرپازدارىنا «ءبىز بىرگەمىز» دەگەن ۇرانمەن كومەك كورسەتۋگە شاقىردىق. اللاعا شۇكىر، بىزگە قۇلاق اسقاندار كوپ بولدى. تۇركيانىڭ قيىن كۇندەرىندە، جاندارىندا بولايىق!»،-دەدى تۇركسوي ۇيىمىنىڭ باس حاتشىسى سۇلتان راەۆ.
قايىرىمدىلىق كەشتە «GATOB_QUARTET» جانە «4RIVERS QUARTET» ىشەكتى كۆارتەتتەرىنىڭ كلاسيكالىق شىعارمالارى ورىندالادى. وپەرا ترۋپپالارىنىڭ سوليستەرى ولەگ تاتاميروۆ پەن ەرجان تاجىمبەتوۆ كەش قوناقتارى ءۇشىن ارنايى باعدارلاما دايىندادى. EverJazz دجاز-كلۋبىنىڭ رەزيدەنتتەرى تانىمال جۇلدىز ديانا ماكينا، Take off Trio, ەكاتەرينا حومەنكوۆا جانە الەكساندر رۋدوۆسكيدە ساحنادا ونەر كورسەتەدى.
«قازاقستاننىڭ مۋزىكانتتارى مەن EverJazz كلۋبىنىڭ مۇشەلەرى اۋىر كەزەڭدەردى باستان وتكەرىپ جاتقان تۇركيا حالقىنا بەي-جاي قاراي المايدى. بارىنشا قولداۋ كورسەتۋگە دايىنبىز»،-دەدى EverJazz دجاز-كلۋبىنىڭ ديرەكتورى الەكسەي گلازىرين.
«GATOB_QUARTET» توبىنىڭ ءبىرىنشى سكريپكاشىسى، ۇيىمداستىرۋشىل اسەم قالمان: تۇركسوي ۇيىمىنىڭ ارقاسىندا تۇركيا تۇركسوي حالىقارالىق جاستار كامەرالىق وركەسترى ءۇشىن ەكىنشى ءۇيى بولىپ قالدى. 2010 جىلدان بەرى ءبىز ۇجىممەن بىرگە انادولى ەلىندە بىرنەشە رەت جانە الەمنىڭ ءار تۇكپىرىندە ونەر كورسەتتىك. ءبىزدىڭ باۋىرلار كورگەن قايعى-قاسىرەت بارلىعىمىزدىڭ جۇرەگىمىزدى ەزدى، قارا جامىلعان ءاربىر وتباسىعا قايعىرىپ كوڭىل ايتامىز. بۇل قايىرىلىمدىلىق كەش ارقىلى ءبىز - الماتى قالاسىنىڭ مۋزىكانتتارى تۋىستاس ەلگە قولداۋ كورسەتكىمىز كەلەدى،-دەدى.
